I Corsi è e vitture

À l’occasione di a surtita d’un bellu libru dedicatu à a nàscita di l’automòbile in Còrsica (L’Automobile à la conquête de la Corse, 1897-1921, da Didier Rey), eccu u tempu di riflette appenna à a leia tercana chì esiste trà i Corsi è e vitture.

 

E prime vitture chì viàghjanu in Còrsica à a fine di u XIXu sèculu sò quelle di a posta. A rete stradale hè piuttostu bona, è i sciuffori t’anu una furmazione di qualità. À pàrtesi di 1901, nasce l’automòbile turìstica : i turisti ponu pagà una vittura cù sciuffore per scopre a Còrsica, trà Aiacciu è Carghjese. In quant’à a vittura di i Corsi, chì c’interessa quì, sò scarse, è a vitezza hè limitata à 30 chilòmetri à l’ora in campagna, à 20 ch/o in cità. Ci vole ad aspettà 1924 da vede una crèscita di e vitture particulare, cù e prime strade incatramate in 1923.

Malgratu u ritardu di a demucratisazione di i veiculi, à u Corsu li piace a vittura.

Di fatti, in 2015, 85,8 % di a pupulazione di l’ìsula t’hà una vittura contr’à 81% in Francia. È spessu, si tratta d’una vittura di lussu : a Còrsica face parte di i quattru primi rughjoni di Francia pè u nùmaru di vitture di lussu, malgratu u fattu chì i rivenuti sò i più dèbbuli di u paese.

D’altronde, i Corsi cùranu e soie e vitture : sò 88 % e vitture à passà u cuntrollu tèchnicu senza prublema. Eppò ci vole à mintuvà u nùmaru di vitture nove cumprate ogni annu : 81 annant’à 1000 abitanti (in cuntinente, ùn sò chè 31 annant’à 1000) !

Una passione vitale

In Còrsica, senza vittura ùn si pò fà nunda. Basta à fighjà i sciffri di l’Insee per capisce : di 2016, à pocu pressu 100% di l’abitanti di l’Île de France t’anu accessu à i servizii principali in menu di 7 minuti. In Còrsica, sò menu di 50%…

Un’antra raghjone di stu fenòmenu hè a mancanza di trasporti in cumunu. Hè da quessa chì u primu settore d’attività ecunòmicu hè a vèndita è a riparazione di vitture è di motò.

Ma a vittura piglia una piazza cusì impurtante chi, s’è no guardemu a carta di a sedentarità fatta da Withings, u leadeur di u pedometru cullegatu, ci rendimu contu chì i Corsi sò l’ùltimi in quant’à u nùmaru di passi effettuati ind’una ghjurnata : 40,8% di a populazione corsa face menu di 4 000 passi u ghjornu, quandu i duttori ci arricumàndanu di fà 10.000 passi !

Una passione spurtiva

E corse automòbile esìstenu in Còrsica prima di vede a generalisazione di a vittura.

Pudemu mintuvà quì u Circuit automobile de Corse, u 21 d’aprile 1921.

Cunniscerà un bellu successu spurtivu è pupulare, ancu s’ell’ùn ci sarà mai una siconda prova. Ci vole ad aspittà 1956, da vede u primu « Tour de Corse automobile ». D’altronde, ci tocca à ramintà chì tutti l’anni ci hè à pocu pressu una dodecina di corse. Sò dinù numarosi l’associ corsi à prò di i ghjòvani piloti. Sicondu à Didier Rey, « l’automobile et le football sont les deux pratiques où la culture corse s’investit le plus fortement».

Una passione di u parè

A Còrsica s’alza à e prime piazze naziunale in quant’à e vitture di lussu, ind’u mentre chì i rivenuti sò dèbuli assai.

Accade spessu chì, à mezu à i ritratti di a famiglia, truvemu a vittura. Eppò, cunniscemu tutti almenu un monta seca chì sorte a so ferrari o a so Porsche Cayenne S, u sàbbatu è a dumènica, fendu duie o trè volte u giru di a cità da fassi valè… Cunnoscu ancu un omu chì a passione hè cusì grande ch’ellu t’hà chjamatu u so ghjattu Turbò !

Una passione stòrica

U Corsu ùn porta micca a so vittura à a demulizione, a lascia ind’i fusseti, spessa brusgiata, ciò chì permette di fà belle scuperte. Cf. le blog de Jean-Jo chì ricerca cun passione i vestighi di e vechje vitture (http://www.accidenti-a-me. com). Face Jean Jo un’inchiesta degna di l’archeòloghi : « Direction un coin perdu dans une région oubliée de tous. Dans les années 30, un jeune ingénieur, qu’aucune famille ne retient plus ici, décide de quitter sa terre natale pour aller refaire sa vie aux antipodes. Il part sans se retourner, ne laissant qu’une petite maison et sa voiture, sagement garée à côté. Et voici que j’apprends avec stupéfaction que, 80 ans plus tard, elles seraient toujours là ! »

È si farà una bella scuperta. Ma cum’è l’archeòlogu, ci vole à lascià in piazza e ruine : «Un peu sonné par cette exhumation, je prends soin de remettre les branchages en place, avec le même respect que les rares personnes m’ayant précédé et je décide de me retirer sur la pointe des pieds, laissant cette MATHIS replonger dans son sommeil auprès de sa maison, dans l’attente, désormais vaine, du retour du maître des lieux. »

Una passione murtale

Per sfurtuna, a vittura tomba. Sò à pocu pressu 37 i morti à l’annu, sia 50% di più ch’è in cuntinente per ciò chì tocca à u nùmaru di morti per millione d’abitanti.

Di pettu à stu fenòmenu, hè natu un associu di e vìttime d’accidenti stradali : FLO-Routes de Corse. Ind’i i tempi, 40% di l’accidenti murtali èranu liati à strade goffe. Puru chì u percentuale appii calatu, esiste sempre. Ùn ci hè chè da vede i guasti di l’inguerni : ponti fallati, scogli annant’à e strade… o a rete stradale chì, d’estate, hè riculmata.

Oghje chì hè oghje, hè a nostra ghjuventù chì, per via di a vitezza, di l’alcolu o di a droga, conta u nùmaru u più grande di morti. Si pò parlà d’un fenòmenu di succidiu cullettivu.

A vittura hè veradimente una passione corsa. Ghjunta dopu à l’astri rughjoni di Francia, aduprata pè a posta o pè i turisti, si sparghje in l’ìsula sana : vittura necessaria per campà, hè detta, ma dinù pè u mutore. Piace a vitezza, ch’ella sia à l’occasione d’una corsa, o surtendu d’una serata alculizata. Ci hè da dumandassi sì, andendu in furia annant’à strade goffe, simu più «Corsi » ch’è ste croce di turisti troppu prudenti…

Marina Chovin.