Arritti entre in a so 55èsima annata !

Pace è Salute à tutti !

U vostru settimanale, amichi lettori, entre in a so cinquantacinquèsima annata! In ssu principiu d’annu, tutta a squadra di a reddazzione vi augura Pace è Salute, fratellanza è forza! Rièscita è gioie per voi è per tutti i vostri cari!

 

Fundatu l’8 di dicembre di u 1966, ARRITTI ferma un settimanale à u serviziu di u pòpulu corsu è di e so lotte. Rivendicheghja l’autunumìa di a Corsica è difende i valori di a demucrazìa, di i diritti di l’omu è di i diritti di i pòpuli.

Sparsu in Corsica, nant’à u Cuntinente è à a spalluzzera, hè un settimanale militente chì scumbatte contr’à u disprezzu è l’offese parigine. Ma hè dinù un impresa chì prova à campà in un cuntestu di più in più diffìciule pè a stampa scritta. Hà pruvatu à mudernizassi à longu à l’anni, è hà migliuratu a so publicazione tènica è cumerciale. A lìnea edituriale ùn hà tantu scambiatu: a difesa di u naziunalìsimu corsu è di e so brame di ghjustizia è di libertà ferma u so ideale; pè u pòpulu corsu, ma dinù per tutte e lotte di i pòpuli sott’à a ripressione culuniale. ARRITTI difende dinù l’eculugìa cum’è filusufia indispensèvule à l’avvene di a pianetta. Lotta contr’à u razzìsimu è a zenufubìa, pè a ghjustizia suciale, pè u sviluppu durèvule è un ecunumìa custruita nant’à a forza di a nostra identità è di i sapè fà isulani.

ARRITTI hà un nùmaru di Cumissione Paritaria è risponde à tutte l’ublicazioni di a stampa. Hà l’auturisazione di publicà l’annunzii legali è ghjudiziarie, un drittu ch’ellu hà guadantu dopu à una lotta di parechji anni contr’à l’amministrazione francese chì l’avìa suspesu di manera inghjusta.

Face un mezu sèculu ch’ellu hè stampatu da a Stamperia Sammarcelli in Biguglia è a so machetta hè fatta di manera prufissiunale dapoi più di 20 anni avà. Oghje ghjè l’impresa Bellini chì n’hè incaricata. Cù i so 1200 abbunati è u so letturatu di più di 5000 personi ogni settimana, ARRITTI hè un veru supportu cumerciale per l’imprese corse chì u scèglianu per publicà e so publicità.

Hè statu fundatu da Màssimu Simeoni ch’era persuasu ch’una lotta di liberazione avìa u bisognu tremendu d’appughjassi nant’à una stampa. Ùn s’hè micca sbagliatu. È, in grazia à ellu, ARRITTI hà partecipatu à tutte e lotte di u pòpulu corsu, è à le volte ancu iniziatu è purtatu certe rivendicazioni. Pè a lingua, per l’ambiente, per l’ecunumìa, ferma un sustenidore ardente.

Per un dettu, ghjè à a Ghjurnata d’ARRITTI di u 1990 ch’ella hè stata fundata a dimarchja Femu Quì pè a creazione d’impiecu in grazia à un azziunariatu pupulare. ARRITTI hà pisatu dinù ind’è lotte cum’è a verità nant’à a catastrofa di Cernobile, contr’à u passagiu di i petrulieri in e Bocche di Bonifaziu, pè a difesa di a lege liturale, eccèttera… ARRITTI hè solu bellu suvente à publicà certe infurmazioni è ghjè un settimanale cunvintu a l’interessu di l’Auropa pè a Corsica è a u rolu ch’ella deve tene a nostr’ìsula in cor’di u Mediterràniu.

Dapoi più di 40 anni, Francescu Alfonsi n’hè u direttore di publicazione è l’editorialistu, è aghju l’onore d’assicurane a capireddazzione.

U mo fratellu, Anghjulu Giovannini, ci aiuta dapoi parechji anni ancu ellu da pòrghjeli sustegni publicitarii. Conta nant’à voi, imprese amiche, per truvà i mezi necessarii à a so cuntinuità.

In quantu à voi, amichi lettori, abbunassi à ARRITTI ghjè firmà in lea cù l’attualità di a nostr’ìsula, ghjè cuntribuisce à l’avvanzate ch’ellu strappa u pòpulu corsu, ghjè prumove a libertà di spressione, è e brame di ghjustizia è di libertà di a nostr’ìsula.

Ùn costa tantu: 55 àuri à l’annu (85 àuri per l’abbunati à u stranieru).

U vostru sustegnu ci aiuterà à mantene viva a nostra a fiara.

Mandate u vostru sceccu à l’òrdine d’ARRITTI, 5 corsu Montera, 20200 Bastia. •

Fabiana Giovannini.