Natu in u 1970, l’associu hà presu in 2020 un antra andatura cù una squadra nova chì brama di custruisce un retale d’insignamentu immersivu in lingua corsa, da pudè dà à a sucietà corsa i corsufoni ch’ella abbisogna. Ssa scumessa a porte un Cunsigliu d’Amministrazione di 23 personi, 3 insignante, 2 Atsem, è mondu sustegnu in giru ! I parenti sò già parechji à scrìvesi è pronti à partecipaci anch’elli ! Arritti hè fieru di esse di i so sustegni è di fà campagna à prò di ssu retale d’avvene. Ghjiseppu Turchini, insignante in liceu pùblicu, hà accunsentitu à esse u primu presidente di a filiera d’insignamentu Scola Corsa. Ci spieca a dimarchja lanciata, i so vantaghji, e difficultà, i bisogni, ma sopratuttu a vuluntà è l’intusiàsimu chì cummanda à cusì bella operata !
Primu presidente di a filiera d’insignamentu immersivu di Corsica, un onore o capatoghji ?
Un onore tamantu, prima di tuttu, a vi pensate bè ! Esse statu investitu da una sguatra cusì entusiastica è sinnuta chì arricoglie militanti assuciativi scritti nù u filu di a storia, sindicalisti cumpetenti, eletti indiati, parenti impignati è amanti di a lingua nustrale ùn pò chè esse gratificante. Detta quessa, ancu l’onori sò castighi è ùn mancanu e faccende ! U travagliu ci hè statu, da pudè mette nant’à raglie sigure i primi vagoni d’un trenu chì s’appronta à scrucià l’isula sana è chì ne traerà d’altri, sin’à a riescita di u prugettu : scola primarie, cullegi è licei immersivi à prò di a lingua, di a cultura è d’un veru prugettu cullettivu. Offizializà a dimarchja, dichjarà i siti, levà l’inciampi materiali, suddesfe l’esigenze amministrativi, buscà i finanziamenti, riclutà l’insignanti, infurmà i genitori, cumunicà da fà sparte a visione, cunvince l’opinione chè no simu nù u veru : simu in principiola, eppuru sò scorsi mesi d’intensa – ma passiunante – attività.
Perchè ti sì lanciatu sta scumessa ? U bisognu ci hè ?
Invece di tutte l’altre regioni di u Cuntinente cù una forte identità, eramu i soli, in Corsica à ùn avè cuncretizatu un retale di stabilimenti immersivi chì, eppuru, hè u solu dispusitivu chì possa pruduce lucutori asgiati, spannati in un pluriliguisimu mudernu è cumpetitivu. Di più, u sistema publicu ùn riesce à ingenerà i quatri di a so propia logistica. Mancanu stitutori bislingui, mancanu prufessori di discipline non linguistiche in cullegiu è in liceu. Dopu à dicennii di trichera, ci tuccava à francà u passu, moltu più chì st’ultimi anni, cù e riforme sculari, hè statu rimessu in causa l’insignamentu bislinguu in l’Educazione Naziunale. Cuefficenti scarsi, valurizazione deficiente, statutu marginale di a LCC : vene ardua pè un insignante, oghje, d’accettà sta misera cunsiderazione nù a so attività prufessiunale. Senza nigà l’impegnu di tanti militanti di a lingua in u publicu – ne facciu parte anch’eiu – abbisugnava propiu à mette in anda stu dispusitivu cumplementariu è emulativu. I ritorni assai pusitivi di a ghjente à u prugettu di Scola Corsa è l’incuragimenti cutidiani ch’elli ci mandanu ci cunfortanu in e nostre certezze.
Spiècaci ciò ch’ellu hè l’insignamentu immersivu assuciativu è u retale Eskolim…
L’insignamentu immersivu, cum’ellu a dice u so nome, ciotta u zitellu da a mane à a sera (cumprese l’attività parasculari, a cantina è a guarderia) in un bagnu orale – po scrittu dopu – apitu à trasmetteli a lingua di modu naturale. E lingue regiunali, pè disgrazia, ùn sò più materne. U spaziu sculare di a prima zitellina, quandu l’elevu hà capacità cerebrali à assimilà parechje lingue è dati pluridisciplinarii faciule faciule, hè u veru pè acquistà tante cumpetenze ch’ellu tenerà a so vita sana. Ma u percorsu, invece di l’immersivu publicu (solu 70 % di u tempu sculare) ùn si pianta à u CP ! Si perseguisce sin’à a terminale. I nostri amichi d’Eskolim, federazione chì racoglie l’Ikastola basche, e calendrete occitane, a bressola catalana, e Diwan brittone è l’ABCM alzazzianu scularizeghjanu più di 14 000 elevi in 182 stabilimenti. Per davvi un esempiu, u liceu di Baionna è quellu di Carlaix in Brittagna anu avutu 100 % di riescita, torna quist’annu, à u bascigliè. Hè una scola di l’eccellenza, i so risultati in francese è in l’altre discipline sò ottimi. È pè ciò : u zitellu plurilinguu sviluppa capacità cerebrali è intellettuali superiori, a dicenu tutti i studii scientifichi.
Site pronti per sta prima rientrata ?
Pronti è più ch’è pronti ! U riclutamentu di e prufessore di e scole hè statu una riescita piena cun trè maestre di spiccu, cunnisciute è ricunniscite pè e so cumpetenze, tutte sperimentate in l’insignamentu bislinguu o immersivu in scola materna. I lucali sò magnifichi : a scola Simone Peretti di Biguglia, muderna è nova framante è u primu pianu di a scola G. Charpak di Toga cù a so corte di pett’à u mare. I cuntenuti pedagogichi seranu ricchi è cuppiati cun attività pruposte da e municipalità, persone o strutture chè no ringraziemu quì pè u so preziosu affollu. Infine, l’associi lucali (unu à scola nant’à u mudellu di u retale Eskolim) di i parenti sò impignati, imaginativi è vulintarosi di fà à a megliu pè a so prugenitura.
Cumu seranu finanzate ste scole ?
Nanzu d’ottene l’aggradimentu di l’Educazione Naziunale capu à un periudu prubatoriu chì pò andà da unu à cinque anni, ci tuccherà à sviluppà e nostre capacità di finanziamentu propie. Hè stata digià lanciata una sottuscrizzione publica è ghjunghjenu e prime cuntribuzioni di particulari è di merrie isulane, ma ci appruntemu à move una segonda mossa ancu più fattiva cù una chjama à finanziamentu participativu, un crowdfunding pè dilla à l’inglese. Anu da esse sullicitate dinù l’intraprese è sapemu chì parechje si mustreranu generose. Publicheremu i nomi d’ogni dunatore è seranu messi in catedra i più maiò quand’è no cumunicheremu.
L’avisu di u Cunsigliu Custituziunale hè statu un culpacciu di più, forse i parenti s’inchiètanu, ùn ci hè penseru pè a filiera corsa ?
Hè vera ch’ellu hà sgumentatu è rivultatu à tutti sta decisione inica di cerberi giacubini à l’anticogna chì hà sdignatu a larga magiurità spressa à u Senatu è à l’Assemblea Naziunale (247 voci contr’à 76.) Però, dopu à e mosse decise ch’ella hà pruvucatu, u guvernu hè andatu indietru è hè stata numinata una cummissione parlementaria chì hà dumandatu à senteci ; renderà e so cunclusioni à a fine di lugliu è ci hè da pensà ch’elle seranu trove mudalità da permette à l’insignamentu immersivu di perseguisce a so missione benefica è appreziata da u più gran numeru. A sanu i genitori chì ci affidanu i so figlioli è sanu dinù chè n’emu ricevutu un ingagiamentu chjaru da a istituzione regiunale. Hà da cresce Scola Corsa è cun ella cresceranu leve di cursofuni capaci, artigiani di u so avvene.
Lampate dunque una chjama à sustegnu ?
Iè. A più larga chì sia. St’operata, hè quella di u populu sanu è tutti devimu mette mani in pasta da fà levità a speranza sbucciata cun ste duie prime scole. Parechje merrie ci anu digià cuntattatu da apre scole nove. Prestu ci vulerà à prevede u nostru primu cullegiu chì aprerà da quì à 7 anni, po i licei. Digià ci tocca à tesse a maglia isulana, pensà à ogni reghjone di Corsica, accoglie zitelli d’ogni origine è classa suciale. In Paese bascu emu visitatu u liceu Bernat-Etxepare di Baionna : ci emu vistu zitelli accrianzati, rispettosi, fieri di a so cultura ma umili, cù una forza sigura in elli, singulare, evidente. Nant’à i muri, mancu una scrizzione, mancu una sgradazione. Eccu u scopu veru : spannà generazioni cuscenti di l’altu valore d’una cultura sputica è à tempu aperta à u mondu, nustrale è universale. •
