L’annata 2020 ci hà presu vite. Ci hà arrubatu e nostre libertà. Hà taciutu mondu altri prublemi dinù. Frà quessi, a sorte di i migranti. Dapoi 6 anni, sò circa 20.000 personi chì sò morte annigate in Mediterràniu. Saranu sicuramente di più, chì u mare s’hè ingullitu forse parechji altri battelli ch’ùn anu lasciatu testimogni. Solu quelli chì sò ghjunti sin’à e sponde aurupee anu pussutu cuntà ciò ch’ellu li era accadutu. Ùn si cunnosce ancu u sciffru macabru di u 2020, ma serà di sicuru troppu impurtante. Di nuvembre scorsu, sò 100 migranti africani chì si sò annigati in 24 ore. Quelli chì sò stati succorsi, anu cuntatu u terrore di vede more i soi senza pudè salvali. Cinque anni fà, u mondu sanu era cummossu di pettu à a morte di u pìcculu Aylan Kurdi, trovu mortu nant’à a rena. Avìa trè anni. U so fratellu di cinque anni, ùn si n’hè parlatu, ma hè mortu incù ellu quellu ghjornu maladettu. Dapoi, ch’hà fattu u mondu civilizatu da pudè porghje aiutu à sta ghjentarella ubligata di francà u Meditterràniu per fughje a guerra è a miseria ? Dapoi u principiu di l’annu, più di 11.000 personi ch’avìanu datu di pettu à tutti i perìculi per ghjunghje sin’à noi, sò stati rinviati in Libbìa, sott’à a minaccia di a vindetta di u regime, è di e viulazioni di i diritti di l’omu è di i tràffichi da tutte e mamme, secondu à l’Organisazione Internaziunale di e Migrazioni. L’OIM dumanda à ristabilisce u salvamentu in mare per piantà sse strage. Ma ùn ci hè un dirigente aurupeu per mòvesi di pettu à ssu scumpientu. In u frà tempu, i trafficanti s’arrichìscenu senza tràmpali nè pastoghje. Battelli scempiati è tracarchi, timpeste, nisun tràccie, nimu per fassi penseri, ùn tèmenu nunda pè u so cumerciu indegnu. Sempre secondu à l’OIM sò sei personi chì mòrenu ogni ghjornu in Mediterràniu. Mare Nostrum hè ghjuntu un immensu campusantu di miseria è di vergogna umana. Invece di luttà contru, i Stati di l’Unione aurupea strìnghjenu e so pulìtiche migratorie. Più di 1000 chilòmetri di muri sò stati rizzati ss’ùltimi anni. 21 milliardi d’àuri sò previsti per rinfurzà e fruntiere aurupee è impedisce i migranti di francale. È i tràmpali contr’à i battelli di salvamenti di l’urganisazioni umanitarie sò multiplicati. U 24 di nuvembre scorsu in Parigi, e battarchjate di a pulizza sò state dinù impiecate contr’à i migranti stallati piazza di a Repùblica.
È quelli chì a si sò francata, ùn sò tranquilli. Laye averà 18 anni da quì à qualchi ghjornu. Hè arrivatu in Francia à l’età di 16 anni, hè statu presu in càrica da un associu in Besançon chì l’hà piazzatu ind’una famiglia d’accolta, è l’hà scrittu à a scola, da ch’ellu diventi pannatteru. Aspettendu d’avè u so CAP, ampara cum’è lavurente ind’una pannatterìa. U so patrone u si vole tene è face una greva di a fame perch’è u Statu u vole spulsà di Francia quand’ellu averà 18 anni. Più di 27.000 personi anu zifratu una petizione da ch’ellu possi stà in Francia.
Eccu. Simi in « u mondu dopu »… •
