U Cunsigliu municipale di Parigi hà datu u nome di Pasquale Paoli à a Calata di a Corsica in u quartu circondu pariginu, vicinu à Notre-Dame de Paris. Chjìbba !
Pasquale Paoli hà datu u so nome à cità americane, hè onoratu in Inghilterra, è ferma in tutti i cori corsi cum’un eroe, ma ch’ellu possi un ghjornu dà u so nome à un locu in Parigi, quessa pò… si pensava pocu ! Sopratuttu sott’à un guvernu cusì chjosu è disprezzante à e nostre rivendicazioni ! Eppuru, a Calata di a Corsica, porterà ormai u nome di « Quai de la Corse – Pasquale Paoli ». Umbeh ! U Babbu di a Pàtria corsa, sìmbulu di l’indipendenza di a Corsica, chì li hà datu a libertà da u 1755 à u 1769, una custituzione, un università, una muneta, un armata, una marina, u drittu di votu à e donne in càrica di famiglia, è tutti l’attributi di una nazione lìbera, sta fiara di u sèculu di i lumi, laudatu da i rivuluziunarii americani è francesi, glorificatu da i grandi filusòfichi di u diciottèsimu sèculu, stimatu da l’Auropa sana… st’omu veneratu, si vede infine ricunnisciutu da a stòria francese !
Hè Ghjuvan’Ghjàcumu Giannesini, elettu di l’XIXèsimu circondu pariginu ch’hà scumbattutu dapoi sei anni per ottene ssu ricunnuscimentu. « Avìu a brama chì Paoli sìa ricunnisciutu in Parigi, ellu ch’hà creatu una Repùblica à mezu à i reami, hà avutu un curagiu è una visione straurdinaria. Era un umanistu ch’hà fattu u so pòpulu, perch’è esiste u pòpulu corsu ! S’hè affidatu à a Repùblica francese, hè statu accoltu à l’Assemblea Naziunale, nanzu d’alluntanassi per vìa di a Terrore »… Saetta ! S’ellu hè cusì chì u sgiò Giannesini hà cunvintu… l’evenimentu hè ancu di più stunante !
Infine chì, a merre di Parigi, Anne Hidalgo, hà datu u s’accunsentu, è Pasquale Paoli hè ormai unu di i persunaggi onorati da a Repùblica francese. Parigini è turisti ch’anu da spassighjà à longu à a Sena, puderanu avè una pensata per ss’omu di gran’valore, Babbu di a Pàtria corsa !
