Arritti vene di francà 58 anni… da quì à dui anni, amichi lettori, u vostru settimanale averà 60 anni ! L’età d’una lotta di già parechje generazioni di Corsi. A prima si spenghje pocu à pocu, quelle chì l’anu seguitatu invèchjanu, e nove generazioni si lèvanu senza avè cunnisciutu strazii, malanni è sperienze acerbe. I più giòvani ùn anu campatu chè gioie è vittorie. E desillusioni naturale d’una strada longa chì dumanda sacrifizzi è annegazioni princìpianu è ci sfìdanu. Averanu, averemu tutti, abbastanza curagiu è forza per resiste à u disingannu ? Pochi anu imparatu a parulla resitenza… Eppuru, a lotta di l’emancipazione d’un pòpulu si scrive in un tempu longu. Ancu di più quand’omu deve scumbatte contr’à un Statu centralistu, uniformisatore, strughjitore d’identità, di lingue, di cultura… un Statu putente, disprezzante, manipulatore, ripressivu. A lotta ùn hè mai compia.
L’8 di dicembre di u 1966 escìa u nostru primu nùmaru da a vuluntà di i militenti di l’èpica chì s’èranu accorti di l’in-ghjustizia à vede sparisce a so lingua, a so cultura, è cù elle tuttu ciò chì face l’ànima di u pòpulu. Si sò levati, è quant’ella hè stata longa a strada ! I primi passi francati, è digià i primi sacrifizii, e prime priggiò, i primi martiri, i primi sbaglii dinù, i fiaschi, l’inganni è l’inghjustizie frà noi… Sò stati pèssimi i camini imprestati, è belle longue à vene e prime vittorie ! In l’annate sessanta, a Corsica ùn sà più ciò ch’ellu hè u sviluppu, cunvinta ch’ùn si pò fà nunda nant’à sta terra aspra. I giòvani corsi si spatrièghjanu. A nostra ànima ribella hè affucata, scurdata. Puru certe còllere schiàttanu, pè u trenu, pè a strada d’Aiacciu à Bastia, pè i prublemi agrìculi, per dì innò à a pulluzione atòmica in l’Argentella, o à e fanghe rosse in Bastia… Quelli ch’anu fattu stùdii, cumpàranu trà quì è culandi, testimugnèghjanu è dinùnzianu… Hè cusì chì nasce Arritti. Conta u disprezzu di sta capitale luntana chì ci hà abbandunatu è chì sparghje sviluppu in i lochi i più pèssimi di u Cuntinente, ma chì laca quì i paesi spènghjesi è i Corsi spatriassi. A vita hè cara, i pochi prudutti isulani ùn ponu rivalizà cù quelli impurtaticci, certi paesi pìglianu sempre l’acqua à a funtana, è u lume cù a lucerna…
« Arritti era un mughju » ci cuntava Màssimu Simeoni, « èramu i zitelli abandunati di u casale francese. Ùn ci era bisognu d’anàlisi pulìtiche di e càuse è di i raporti di u giacubbinìsimu francese è di a culunisazione. Uni pochi èranu sempliciamente surpresi di vede ch’elle s’aprìanu sempre e strade ind’è l’Imperu culuniale persu, ch’ellu si fecìa culandi uspidali è scole, invece chè in Corsica ùn si fecìa nunda ».
« Avìamu u bisognu di facci sente. Ci vulìa un ghjurnale. Ci simu lanciati » cuntava torna Màssimu. È cusì, Arritti hà ghjuvatu à dì, à testimugnà, à dinunzià, à prumove, à prupone. « Arritti ghjove à appruntà i spìriti, à porghje argumenti à i nostri militenti da armali, per sparghje l’edee, fanne a pedagugìa, cunvince di più ghjente »…
58 anni dopu. Arritti hè quì, è vi chjama o ghjente à cuntinuà sta lotta. Malgratu l’agressioni, a ripressione, i barbusi, l’affocu. Hè sempre arrittu. Malgratu e manipulazioni, e desilluzioni, i sbaglii, è e difficultà di tutte e mamme, ci tocca à firmà arritti ancu noi ! Dàteli forza. Cuntinuemu inseme à scrive a stòria di ssu pòpulu è di ssa terra millenaria da ch’ella sbucci lìbera. Leghjite è fate leghje Arritti ! •
