U Papa Francescu ci hà auguratu per compie a messa di u Casone : « Bon caminu ver di a Santa festa di Natale ! »… è e so ricumandazioni « sìate vicini, di e personi anziane, i malati, i zitelli, e personi sole, i prigiuneri, sìate vicini cù u core »… sò u caminu chì ci cunduce.
Si compie un annata torna di capatoghji è strazii. E difficultà di u mondu ci affòcanu, a Corsica hè di più in più tocca da u riscaldimentu climàticu, ne campa e cunsequenze, ma dinù campa e cunsequenze di e guerre ch’addebulìscenu a nostra ecunumìa sregulata, fàcenu cresce e misèrie, è sò di più in più numarosi a ghjente à campà sott’à u livellu di puvertà. L’associ d’aiutu umanitariu anu di chè fà. È a sulitùtine pesa troppu in e case isulane. Cresce l’egoìsimu, ancu ind’è e famiglie. In ssu parapiglia è tene di dulori è disgrazie, e bassezze è l’ignòbile di a natura umana si fàcenu sente… Si compie l’annata cù stu prucessu stumachente d’un omu ch’hà vendutu à decine d’altri omi a so moglie drugata à l’appiattu è viulentata allora ch’ella era addurmintata. Una cinquantina d’omi anu seguitatu a scimità di quell’omu chì vendìa dopu l’imàgine di ste viulenze nant’à u net. Una donna, ma dinù i so figlioli è quantu famiglie arruinate è distrute ! St’annata hà vistu dinù a venuta in Corsica di e caravane Mouv’Enfants… amparènduci u martoriu di quantu zitelli, vìttimi d’abusi sessuali da i so parenti, o da ghjente vicina di a famiglia, à le volte durante anni è anni… Ancu ind’è noi, o ghjente, ancu ind’è noi… Da stu mondu scundizatu, dillinatu, nàscenu u vìziu è l’orrori. I più dèbbuli, i più nucenti, sò cìbuli.
Ancu assai, sè l’omu hè un mullizzu per l’omu, hè dinù un tesoru per l’omu. Sta dualità di l’èssere umanu induve u bè è u male si fàcenu una guerra permanente ùn hè micca sempre à favore di u satanescu ancu assai. À a precarità, e misèrie, l’offese, rispòndenu omi è donne maravigliosi, cù associ è impegnu di sulidarità è disinteressu.
L’annata 2024 hè stata diffìciule torna nant’à u pulìticu, à scumbatte per dà di pettu à u cutidianu, è per privede i lindumani cù stituzioni migliurate. Torna un’annata di dibàttiti è rivendicazioni, di brame è di desilluzioni. Fendu cum’ella li pare, Corsi si ghjòcanu troppu di e lege per disgrazia, è u disprezzu di e règule arruina u nostru ambiente ch’hè u tesoru di a Corsica.
In tuttu stu cumbugliu, a venuta di u Papa hè stata un bùffulu d’aria pura, cum’è per ramentacci chè n’avemu in manu u nostru avvene, chì forse basta un pocu di vuluntà è di fede in sè, per sveglià e nostre capacità individuale è cullettive à sparghje amore è carità. « E vostre tradizioni sò una richezza da cultivà è da priservà ma micca per isulavi. Mai. Dèvenu andà di paru cù u scontru è a spartera » hà dettu Papa Francescu. È sè no fecìamu nostra a scumessa ? Sse parulle ci dìcenu a forza cullettiva di u nostru pòpulu è a strada di a so emancipazione : « un core apertu à u mondu ». « Site un esempiu di virtù in Auropa » hà dettu torna Francescu, parlendu di a nostra manera di campà a pietà pupulare. Chì rispunsabilità ! Firmà è affirmassi cum’un esempiu. Da seguità à Rousseau… stunà u mondu !
Bon caminu, amichi lettori, ver di a Santa festa di Natale ! •
