S’aspetta sempre sè u Statu hà da cappià i 50 M€ pè a Delegazione di serviziu pùblicu in i trasporti marìttimi è aèrei di a Corsica. U destinu di centinaie d’impiechi corsi hè suspesu à u votu di u bugettu francese. Ma u primu ministru hè in difficultà. A so pupularità si sfonda è tutti i gruppi u critichèghjanu, sin’à a so magiurità ! Ancu s’ellu appieca u famosu 49-3 chì li permette d’aduprà una lege senza dumandà u votu di l’assemblea naziunale, i gruppi d’uppusizione vuteranu una muzione di censura chì pò fà cascà u guvernu. È cù ellu tamante illusioni perse !… Cum’argumenti di ricusu di i 50 M€ bramati da a Corsica, u guvernu hà fattu valè i 50 milliardi da truvà per l’equillìbriu di u so bugettu…
Eppuru, hà datu cum’è s’ella ùn era nunda 72 M€ pè a custruzzione d’un centru di spiccanza di i lozzi casalini in Monte ! Cuntrariu à e direttive aurupee, bramatu da a maffia, impuzzicante per l’ambiente, d’un prezzu prontu à arruinacci per decine d’annate, stu mercatu pùblicu tamantu u mondu hè statu guarantitu da u Statu francese ch’hà prumessu di pacanne omancu 80 % pè a so custruzzione prevista in trè anni… è 188 millioni d’àuri dopu durante 10 anni pè u so funziunamentu ! U permessu di custruì hè statu spostu d’aprile scorsu da u Syvadec, u marcatu attribuitu, simu ghjunti à a fin’di e prucedure… a custruzzione principierà da quì à pocu. L’associ di l’ambiente, è i cullettivi di lotta contr’à a màffia, si sò aduniti in u cullettivu Corsica Pulita per dinunzià u pianu di trattamentu di lozzi è tutte l’incuerenze di a pulìtica chì rege e nostre rumènzule. Ma cumu ne simu ghjunti quì ? Cumu serà pussìbule di fà scelte cusì gattive per l’ambiente è pè a ghjente ?
U scopu di u centru di Monte, è di quellu chì serà custruitu dopu in u Pumonte, hè di spiccà u lozzu. Ma cumu spiccà plàsticu, vetru, ferrame, aluminium, carta è cartoni, restu di pittura è di calcina, vechji medicamenti, ecc. di e muzzicature di carne è pullastru, i buchji di pomi, e sumente di pumate, u fondu di cafè, e fascie di e criature, è tutte ste rumènzule carche d’acqua, chì pigliate sole ponu esse un tesoru di rinascimentu pè a terra, ma imbullighjate ind’è u soddu tòssicu, cancarogenu, rughjinosu è merzu volta pùzzicu è risicosu !
Oghje tuttu ciò ch’ùn hè spiccatu hè piattu sottu terrra in u disprezzu di a natura è ci vòlenu cunvince chì tuttu anderà di megliu ? U mondu hà amparatu assai nant’à u lozzu, è sà cumu rege a prublemàtica. Basta à spiccalu, à mèttelu in e filiere di riciculerìe, à valurizalu. Tuttu si trasceglie oghje, ancu e vechje buttiglie d’ogliu anu un’antra vita !
È i Corsi ? Burlati, trattati cum’è ciucci, si cunvìncenu chì tuttu hà da esse regulatu cù sti dui centri di spiccanza. Aspettendu pàcanu, è pàcanu caru u trattamentu di u so lozzu, è pacheranu di più in più caru vistu i modi di trattamentu brinnaghji messi in ballu.
I nostri deputati anu scumbattutu sin’à oghje pè i trasporti, è l’assemblea naziunale hà vutatu l’amendimentu spostu pè i 50 millioni di a DSP, puru u bugettu ùn hè ancu vutatu… è daretu à ellu ci hè a minaccia di a censura… Ma ùn vi inchietate, u centru di Monte, ellu, si ferà ! •
