Accapu di a reddazzione

40 anni !

« Studià hè libertà ! » dicìa u Babbu, Pasquale Paoli, fundadore di l’Università di Corsica ! Tuttu hè dettu in trè parulle di a lotta ch’ella hà incarnatu l’Università à longu à 256 anni di stòria ! Aperta in u 1765 à u Palazzu Naziunale, era a fiura di a ghjòvana nazione corsa indipendente. Ùn si pò omu imaginà a gioia è a fiertà di i primi studienti è quelli chì l’anu accumpagnati cù a brama di custruisce un paese lìberu è mudernu in core di u diciottèsimu, à mezu à i perìuculi chì a minacciàvanu ! Quattru anni hà pruiettassi è dassi di rimenu per rizzà a Corsica à livellu di e più grande nazioni di l’èpica. Disgraziosamente dopu à a disfatta di Ponte Novu, chjode a nostra università in u 1769, è ci volerà una longa lotta di più di dui sèculi per vèdela àpresi torna. L’Università d’estate di l’èpica di u riacquistu pòrtanu ssa rivendicazione naziunalista per piantà l’esiliu di a ghjuventù è dalli mezi di studià in u so paese. Aprerà e so porte in u 1982 in grazia à a prumessa di u candidatu Mitterrand diventatu presidente di a Repùblica. Piglia u nome di u so fundadore Università Pasquale Paoli ! È, dapoi, ùn hà mai sfiatatu, scumbattendu contr’à tutti i tràmpali per cresce annu dopu à annu è offre à a ghjuventù corsa l’insignamentu di altu livellu, a capacità d’innuvazione, a creatività, a ricerca, a dinàmica ecunòmica, u spannamentu suciale è culturale ch’ella abbisugnava. 40 anni dopu, sò millaie i ghjòvani ch’anu truvatu in Corti u mezu per custruisce è riesce a so vita d’omu è di donna. Da 700 studienti tandu, sò oghje più di 5000, 100 diplomi pluridisciplinarii, 8 indiature di ricerca, 100 manifestazioni scientìfiche ogni annu ! L’Università crea u so Istitutu Universitariu Tecnulògicu in u 1984, pò l’UFR Drittu/Lèttere/Scienze in u 1985. Sò creati in u 1974 a Cunsulta di i Studienti Corsi, a Ghjunventù Paolina in u 1992 è a Ghjuventù Indipendentista in u 1999. L’Istitutu d’Amministrazione di l’Intraprese (IAE di Corsica) nasce in u 1994, è, in u 2000, a Scola Dutturale « Ambiente è Sucietà » è u Laburatoriu Scienze per l’Ambiente cù u partenariatu di u u CNRS, pò u Laburatoriu Lochi/Identità/Spazii in u 2008. Nàscenu dinù sessioni d’università aurupee (2002), pò Università citatine (2003)… è parechje altre manifestazioni in giru à a cunniscenza ch’ella sparghje l’università. In 2004, hè creata a prim’annata di Medicina pò l’Istitutu Universitariu di Salute in 2010 ! In 2008 nasce a Licenza Scienze Pulìtiche è l’IUFM integra l’Università in 2009, pò diventa ESPE in 2013. Eculugìa, diaspora, impiecu, energìa, mediterraniu, salute, ecunumìa suciale è sulidaria, numèricu… l’Università sparghje a so dinàmica cù rete, cullochii, cunferenze, partenariati, pulpitre. In 2011, si lea cù l’INSERM, è apre a prima prumuzione di a scola d’ingeniore Paoli Tech. In 2012, s’apre a piattaforma Myrte di ricerca nant’à l’energìe rinuvelèvule, è l’Università entre in e rete sintinelle (nate in 2005) di a grippa. Hè frà e prim’università à ottene u statutu di rispunsabilità è cumpenteze allergate in u 2009 (RCE). In 2009 dinù hè creata a Fundazione di l’Università di Corsica per prumove e so capacità è e so lee cù a sucietà corsa. In 2013, nasce u Diplomu Ghjurnalìsimu è cursufunia. In 2016 s’apre u FabLab di Corti. In 2019, un novu bastimentu Scienze Umane è Suciale hè battizatu Edimondu Simeoni… ecc… Chì fiertà ! Bon’anniversariu è longa vita à a nostra università ! •

Fabiana Giovannini.