A settimana scorsa, intitulàvamu ssa rubrica « Elisa, 23a ». Elisa, donna corsa di 23 anni era a 23a vìttima di feminicidiu in Francia. Una settimana dopu, ci sò stati sei altre vìttime… Sei.
È quantu seranu torna da quì à ch’ellu sìa publicatu ssu nùmaru d’Arritti ? Quantu ne pienghjeremu stu màrcuri 8 di marzu, dettu Ghjurnata internaziunale pè i diritti di a donna ? À chì ghjòvanu e ghjurnate specìfiche ? Arritti ùn pianterà di parlanne fin’tantu chì l’omi chì ci règenu ùn metteranu micca manu in pasta per luttà contr’à sta malamorte.
Per ogni avvanzata, ci hè vulsutu bàttesi. In u 1791 s’adopra a Dichjarazione di i diritti di a donna è di a citatina chì dice « a donna nasce lìbera è para à l’omu in dirittu »… Puru, ci hè vulsutu aspittà torna quasi un sèculu, in u 1836, da ch’ellu sìa urganizatu l’insignamentu primariu pè e fèmine, è u 1861 da chì una donna possi prisentassi à u bascigliè. Torna u 1880 da ch’ellu li fussi autorizatu l’insignamentu secundariu. In u 1900 ponu divente avucata. In u 1907 ponu dispone di e so pache di manera lìbera. In u 1938 ponu scrìvesi à l’Università senza l’autorisazione di u so maritu. È ghjè solu in u 1944 ch’elle ponu vutà. In u 1946 a parità trà omi è donne in tutti i duminii hè scrittu in a Custituzione. Puru, face menu di 60 anni, in u 1966, chì e donne ponu avè un attività prufessiunale è rege da per elle i so averi senza l’accunsentu di u so maritu. In u 1967, ponu apre un contu à a Banca. A listessa annata hè adupratu u drittu à aburtisce. In u 1972, a Scola Politècnica hè autorizata à e donne. È una donna sorte maiore di a prumuzione ! A stessa annata a parità di remunerazione trà omi è donne pè u stessu travagliu hè ubligatoria. In u 1975, tutti l’insignamenti pùblichi è privati dèvenu àpresi à e donne. In u 1993 a lege dice chì l’esèrcitu di l’autorità parentale deve esse paru trà u babbu è a mamma. È ci hè vulsutu aspittà u secondu millenariu, in 2000, da chì a lege guarantisci a parità eletturale…
Si vede quant’elle sò longhe l’avvanzate è quant’ellu ci tocca à scumbatte torna da chì certe lege sìppianu veramente rispettate. In quantu à e viulenze contr’à e donne, in u 1974 hè creatu un Secretariatu di Statu à a cundizione feminile. È ghjè solu in u 1975, ch’ellu s’apre u primu locu d’accolta pè e donne chì subìscenu viulenze (in Clichy). In 2004 a lege nant’à u divorziu prevede l’evizzione di casa di u cunghjutu viulente. In u 1977, l’Urganisazione di e Nazioni Unite decide di cunsacrà una ghjurnata internaziunale à i diritti di a donna, l’8 di marzu. Puru i so dritti fèrmanu sprezzati in u mondu, è dinù in Francia. A donna è u zitellu sò e prime vìttime di e guerre. Viulentala face parte di l’arme di a guerra… In tempu di cunflittu, cum’è in tempu di pace, a donna hè un ogettu, una prupietà, svalutata, sprezzata, ch’omu pò inghjulià, viulentà, batte, assassinà. E sanzioni ùn bàstanu. A prevenzione ùn esiste micca. U crìmine di feminicidiu ùn hè micca ricunnisciutu in a lege. Spessu ssi crìmini sò ghjudicati cum’è criìmini passiunali, è micca cum’è veri assassinii. Fin’tantu chì l’autorità pùbliche, Statu, pulizza, ghjustizia, ùn piglieranu a misura di stu fragellu, averemu sempre da pienghje donne marturiate. •