Accapu di a reddazzione

Migrante

In 2020, malgratu u coronavirus è l’interdizzioni di mòvesi trà paesi, sò 3174 migranti morti in cor’di ssu longu viaghju secondu à l’Urganisazione Internaziunale di e Migrazione (OIM). Frà elli, 1773 morti nant’à e strade di l’Auropa, per avè vulsutu francà e fruntiere chì tùppanu u so avvene.

È ancu… si parla quì di quelli ch’omu hà pussutu cuntabilizà… I morti manghjati da i squali in Mediterràniu, o quelli morti di freddu ind’è a neve ch’ùn sò stati ancu restituiti da a muntagna, ùn sò micca ind’è e statìsche. Sò nimu. Scurdati da l’Umanità, fora di e so famiglie firmate senza nutizia… Dice l’OIM chì a pandemìa di Covid19 ùn hà tantu frinatu e migrazioni. Secondu à ss’amministrazione di i Stati Uniti, ci sarìa statu in Mediterràniu omancu 14 battelli in più affundati è detti invisìbile perch’è hè diffìciule di sapè quant’ellu ci era ghjente à bordu. Circa 600 morti di più secondu à l’OIM, per ssi battelli custì induve omu sà ch’elli sò stati affundati ma… quant’altri torna? Quantu zitelli, donne, omi culpèvuli solu di a brama d’un antru avvene? Di a speranza di truvà un accolta? Indidati ch’elli èranu nanzu à a pandemìa, i migranti sò scurdati oghje di e nostre sucetà puru dette «muderne» o «civilizate». Ùn ferma più nimu o quasi per difèndeli. Indiferenza, disprezzu, à le volte ancu odiu, «l’omu hè un lupu per l’omu» dicìa u filòsofu Thomas Hobbes. I migranti sò di più in più disprezzati, «zenufubìa in crèscita, mancu d’accessu à i servizii, precarità in crèscita dinù, arrestazioni arbitrarie, è ssi trè millioni omancu di personi bluccati à e fruntiere è ch’ùn ponu rientre in casa soia» dice torna l’OIM.

In ssu maràsimu di disprezzu, ci tocca à ringrazià l’aurudeputati Verdi/ALE chì cuntinuèghjanu à sustene l’associ chì scumbàttenu dinunziendu ssa vergogna. Ogni tantu vanu di manera simbòlica à a fruntiera trà Francia è Italia per aiutali à francala. Ssu primu di marzu, Michela Rivasi per un dettu, hè andata in Montgenèvre cù l’associi Médecins du Monde è Tous Migrants, per dinunzià a pulizza ch’ùn rispetta nè e Cunvenzioni internaziunale di u drittu d’asiliu, nè e lege francese, nè l’avisu di u Cunsigliu di Statu chì ramenta ch’ellu ci vole à rispettà ssu drittu d’asiliu. «Ci vole à rompe a sciappa di u silenziu, rompe e fruntiere» dìcenu i deputati Verdi/ALE. In ssa notte di ghjaccia anu pussutu salvà una donna afgana cù un ciucciu di 4 mesi appiccolu è à fiancu, un zitelettu di 3 anni, ancu assai cundutti cutrati sin’à l’uspidale. Quessi, a si sò francati, ma quantu sò à èssesi piantati di pettu à una fruntiera chjosa? S’elli ùn era stata aiutata ssa mamma cù i so dui ciucci, serìanu stati ubligati di vultà in daretu, ind’è a neve, senza sapè induve andà, dopu à avè fattu centinaie, à le volte millaie di chilòmetri da l’Africà sin’à l’Auropa, franchendu parechje fruntiere per fughje una vita di misèria è bramà un lindumane in Auropa. Ùn si ponu truvà scuse à i nostri mancamenti di pettu à una mamma è i so ciucci chì chèranu aiutu. Cumu l’omu pò scurdassi di a so umanità?

Sta settimana torna, i deputati aurupei Verdi/ALE vulteranu à a fruntiera per dinunzià e nostre pulìtiche desumanizate. Da fà triunfà u mottu di Spinoza nant’à quellu di Hobbes… «l’omu hè un Diu per l’omu».

Fabiana Giovannini.