U mondu hè cummossu è svultulatu da a revelazione di crìmini di guerra di l’armata russa in Ucrainia… A scuperta di cìvili massacrati allora ch’elli èranu surtiti per cumprassi un pezzu di pane o per andà à circà un pocu d’acqua o un pocu di legna per scaldassi. Sò stati assassinati perch’elli èranu sempliciamente ucrainiani, o perch’è ùn ci era micca suldati da piglià in mira. Sò assassìnii gràtisi. Certi sò stati scuperti e mani liati in spinu è una palla in capu, eseguitati dunque di manera barbara. Dinù ste donne chì sò state viulentate da suldati imbriachi o nò, cù òrdine o nò. In certi paesi, in tempu di guerra, suvente e donne sò trufei, è e furzature un attu di guerra. Ma micca quì in cor’di l’Auropa, trà paesi detti civilizati ! Si sà quant’elle sò brutte e guerre ma fèrmanu còdici è règule internaziunale da ùn tuccà i cìvili, da prutègeli è da circà à fanne u menu morti è feriti pussìbuli. Ùn hè micca statu u casu in Butcha. U martoriu di ssa corcia ghjente hè un livellu di più ind’è u spaventu è u stumacheghju di ssa guerra chì i Russi chjàmanu « sèmplice operazione militare »… Eppuru ! Eppuru, ùn ci vole à rompe i fràcichi leami di u dialogu, a rispunsabilità quale fùssinu u cunflittu è i so prutagunisti, cummanda à cuntinuà à pruvà à parlassi è cuntrastà. Hè cusì in u mondu sanu, da tutte l’èpiche ch’elli si sò regulati i cunflitti in grazia à ghjente capaci di mèttesi à livellu d’ugnunu, di pruvà à capisce e so caggioni è truvà cusì u filu fràcicu di u regulamentu di u cunflittu. Sta ghjente si chjàmanu i « Signori di a Pace ». Sò nèutri, micca o pocu cunnisciuti à livellu mediàticu, pròvanu à framèttesi è intervene da truvà u mettudu di dialogu u più efficace. In Bosnìa, in u Rwanda, in Irlanda, in Paese Bascu, à u Burundi, u Sudan, u Guatemalà, i Balchani, u Sri Lanka, l’Algeria, u Libanu, u Pakistanu, l’Indunesìa, a Palestina… sò intervenuti, à le volte sò ghjunti à strappà un arrestu di i cumbatti, è ancu à custruisce a pace di manera durèvule. Arritti cunsiglia a lettura di un libru esciutu in 2006, scrittu da Roger Faligot à l’Edizione Seuil, « Les Seigneurs de la Paix ». S’impara assai in u mèttudu è à le volte l’efficacità di sta ghjente quandu tutte e speranze sò morte per impone a pace. Seranu in azzione sti signori di a pace in Ucrainia ? Bisognu ci hè. È Macron chì dice vulè cuntinuà à parlà à Poutine, chì sarebbe u so rolu ? Cosa spera ? Ci vole à cuntinuà à neguzià, o omancu, pruvà di parlà cù Poutine, malgratu i crìmini di guerra, hè forse quì u prezzu di a Pace. Ma Macron serà veradimente u megliu piazzatu ? Cumu si pò avè a leghjittimità di parlà cù un Poutine è i so crìmini di guerra, quand’omu ùn hè micca capace di parlà cù l’eletti di a Corsica, demucraticamente eletti è omi di pace anch’elli ? Cumu pratende « a situazione ùn hè micca calma »… per ùn riceve in Parigi ss’eletti chì pròvanu à fassi sente per ghjustamente calmà a còllera di u pòpulu per vìa d’un scàndalu di Statu à u quale Macron ùn vole micca risponde ? U prezzu di a pace in Corsica ùn sarebbe micca ghjust’à puntu a capacità d’apre u dialogu senza cundizione ? •