I raporti trà eculugisti è naziunalisti ricòllanu à parechje decine d’annate. 30 anni omancu, quandu Màssimu Simeoni hè statu elettu à u Parlamentu aurupeu in u 1989, cum’è persunalità d’apertura nant’à a lista d’Antoine Waechter. 9 anni nanzu, in u 1980, i naziunalisti d’Auropa, Scuzzesi, Sardi, Catalani, Galiziani, Gallesi, Corsi, Baschi… avìanu creatu in Bastia, à l’invitu d’Edimondu è Màssimu Simeoni l’Alleanza Lìbera Aurupea. Tandu, quandu Màssimu hè statu elettu, verdi è naziunalisti aurupei anu cuntinuatu l’accordu eletturale cù a creazione d’un gruppu chjamatu « arcubalenu ».
A cuuperazione hè stata ripruduta dopu cù l’elezzione, in u 2009, di Francescu Alfonsi, anch’ellu cum’è persunalità d’apertura, raprisentente di e regioni è i pòpuli sulidarii nant’à a lista di Auropa Eculugìa. U gruppu hè statu chjamatu «Verdi ALE » è hà purtatu assai à a Corsica per circà di parà u tràmpalu francese. U mandatu di Màssimu Simeoni in u 1989, è quellu di Francescu Alfonsi in u 2009, èranu lìberi è senza ublicazione, fora di una sulidarità mìnima. U mandatu hà sempre appartenutu à l’ALE, è micca à l’eculugisti. Face ch’hè statu sanu sanu un mandatu naziunalistu, purtatu dinù, parte francese, da a Federazione Regioni è Pòpuli Sulidarii ch’adunisce in Francia l’autunimisti o l’indipendentisti alsaziani, baschi, brittoni, catalani, occitani, savusiani.
È ancu i berberi di Francia aduniti ind’è u Cungressu Mundiale Amazigh ! Hè pèssimu tandu di pensà chì R&PS sò ghjente « riformisti ». Incù di più difficultà chè noi, si bàttenu pè a libertà è a dignità di u so paese. Rivendichèghjanu l’autunumìa, l’ufficialità di a so lingua, un statutu di residente per ùn perde a so terra, un statutu fiscale per sviluppà un ecunumìa identitaria è bràmanu a so ricunniscenza in tantu chè pòpulu ! Certi sò indipendentisti, appunghjèndusi nant’à u sud, cum’è i Catalani di u Nordu. Vale à dì, i militenti di R&PS sò naziunalisti quant’è noi ! In quantu à u scrutinu aurupeu, di pettu à u disprezzu è à a negazione di i nostri dritti da u Statu francese, a scena internaziunale è aurupea hè fundamentale pè u naziunalìsimu corsu. quale ùn a capisce ?! Infine chì u sciffru 9 hè un sciffru aurupeu pè a Corsica ! Di maghju 2019, ci saranu l’elezzioni à u parlamentu di Strasburgu è a Corsica pò vince torna un deputatu cù un apertura chì li hè fatta à a novèsima piazza da l’eculugisti ! Certi diceranu chì trà a caccia è i discorsi nant’à u nucleariu, fatìcanu !
Ma sò soli à daci un pocu d’interessu per un elezzione à livellu naziunale chì sarebbe inaccessìbile à i Corsi soli, oppuru à e regioni sole. Ci tocca dunque à azzincà u nostru vagone à ssa locomotiva per circà di strappà ssa raprisentazione impurtantìssima à Brussella. Eccu a scumessa.
Fabiana Giovannini.