Una donna hè stata tomba ind’è a nuttata di u 7 à l’8 di ferraghju in Borgu. Ùn si ne sà di più per avà, solu ch’hè statu arrestatu un omu d’una vintina d’annata, messu in guardia custoghja, pò inculpatu d’umicìdiu vuluntariu. A donna avìa 55 anni. Ind’a serinata, a guardia custoghja hè stata piantata è l’omu hè statu purtatu à l’uspidale per vìa di u so statu psichiàtricu hà fattu sapè u precuratore di a repùblica. Ùn si sà ancu s’ellu hè un feminicìdiu, ma una donna hè morta.
Dapoi u principiu di l’annata, già ottu donne sò morte assassinate da u so cumpagnu di vita. 14 zitelli fèrmanu senza mamme.
Isabella hè stata minata à calci è à pugni u primu di ghjennaghju da u so cumpagnu, un omu d’una quarantina d’annata. Ghjè ellu ch’hà chjamatu a pulizza. Ùn era micca a prima volta ch’ellu a minava. L’assassiniu s’hè passatu in Haumont, ind’è u Nordu a notte di Capu d’Annu. Qualchi ghjornu nanzu, i succorsi èranu già stati chjamati in casa. Isabella vulìa andàssine, ma, dìcenu i so vicini, « sapìa cunvìncela » fènduli paura. Isabella era mamma di dui cinnini.
Graziella avìa 54 anni, hè stata pugnalata u 4 di ghjennaghju da u so maritu in Nova Caledonìa. Hè scappatu u maritu di 52 anni, lasciendu a so moglie viutassi di u so sangue invece di chjamà i succorsi. Hè statu arrestatu imbriacu. Graziella era mamma di sette figlioli.
Sandy hè stata tomba u 7 di ghjennaghju, in Bretigny-sur-Orge in l’Essone tichjata di colpi. Avìa 34 anni è hè stata tomba da u so cumpagnu di 29 anni. I dui figlioli di u coppiu, una zitelluccia di 4 anni è un zitellu di 7 anni, anu vistu u crìmine è anu ricevuti colpi anch’elli. Sò i vicini ch’anu chjamatu i succorsi, sentendu i mughji. I pulizzeri ghjunti in fùria l’anu intesa mughjà anch’elli ma ùn anu pussutu intervene chì a porta era curazzata. Quand’elli anu riesciuti à entre, era troppu tardi per Sandy. L’omu era statu cundannatu già trè volti per viulenze.
Nasrine s’hè morta ella à 41 anni in Cenon ind’è a Gironde u 9 di ghjennaghju. Ghjè u so maritu di 43 anni chì l’hà scannata. Ghjè ellu ch’hà chjamatu a pulizza dui ore dopu à l’assassiniu. Nasrine avìa trè ciucci di 5, 9 è 10 anni.
U 15 di ghjennaghju, in Laon ind’è l’Aisne, ghjè Sonia, 52 anni, ch’hè stata sequestrata po strangulata da u so anzianu cumpagnu, un omu ch’hà pruvatu à tumbassi dopu à l’assassiniu, aprèndusi e vene. Sonia s’era staccata d’ellu dui mesi nanzu. Sò i soi ch’anu chjamatu a pulizza inchieti di a so sparizione. S’hè affaccata a pulizza ind’è ellu è hà truvatu a donna morta è l’omu svenutu.
U 15 di ghjennaghju torna, in Luçon in Vendée, Evelina hè stata strangulata. Avìa 69 anni. Hè u so cumpagnu di 61 anni chì l’hà tumbata, pò hè scappatu. Hè andatu à l’uspidale induv’ellu hà palisatu u so crìmine. Era imbriacu.
U 29 di ghjennaghju una donna (ùn si sà u so nome) d’una settantina hè stata tomba da u so maritu in Portiragne-Plage ind’è l’Hérault. L’omu l’hà palisatu à a vicina ch’hà chjamatu a pulizza. Anu truvatu a donna insanguinata in casa è l’omu impiccatu.
Eccu. S’aghjusta u crìmine in Borgu ma ùn si sà ancu nè u nome di a vìttima, nè e circustanze di l’assassìniu.
93 donne sò state tumbate da u so maritu o u so cumpagnu di vita in 2024. Èranu 103 in 2023. À sti crìmini, s’aghjùstanu e donne assassinate da i so figlioli o d’altri membri di a famiglia. •
