20 anni ch’ella esiste Scola in festa, a scola di cantu, mùsica è ballu di Felì. Per vìa di a crisa Covid ùn anu pussutu i zitelli festighjà cum’elli vulìanu sti 20 anni di travagliu è d’òpere creative, allora, cù l’aiutu di a so mascotte, Puppeppu, anu fattu un filmettu ! Magnìficu di gioia, di culori, di mùsica per festighjà a lingua è a cultura corsa !
I vulemu inventà i culori… cantanu i zitelli ! Eccu u messagiu di stu filmettu è u cantu incù ellu chì testimunieghja di ssi 20 anni di travagliu di tutti ssi cinnini è i più maiò ch’anu seguitatu i corsi, dapoi tutte st’annate. Cù a so scola, Felì ùn si cuntenta micca d’amparà a lingua è u cantu à i so elevi, appronta a leva di dumane. Da i più chjuchi, ghjunti avà, à i più maiò, tamantu travagliu, bellìssima tramandera è tamant’operata per « fabricà » i Corsi di dumane ! Scola in Festa sò oghje 300 elevi, da 6 anni à i più anziani ! Lingua, mùsica, cantu, ballu, teatru, allegrìa ! Eccu i culori di ssu filmettu, eccu i culori di ssi zitelli, è di i valori tramandati !
D’ottobre 2020, hè esciutu un primu discu, Eu cantu, cù 10 canzone, 10 filastrocche, 5 puesìe, scritte da Ghjàcumu Fusina, Petru Santucci, Ghjuvan’Teramu Rocchi o Felì. Vole ghjuvà à u pùblicu, ma dinù à e maestre è i so elevi (un esempiariu hè statu distribuitu à tutti i prufessori di e scole preelementarie è elementarie, dinù i prufessori di corsu di i cullegi è licei di Corsica. Hè dinù à a dispusizione di tutti nant’à u situ di a scola).
Per via di a crisa sanitaria, Scola in Festa ùn hà pussutu fallu cunnosce à l’uccasione di a so festa annuale ch’accoglie centinaie di parsoni ogni annu, ma anu travagliatu listessu i zitelli è i più maiò, i corsi ci sò stati, da tutte e manere ch’ellu era pussìbule, è per fà passà u so messagiu, eccu oghje à Puppeppu, a mascotte di a scola ! Vulemu inventà i culori, hè un mughju d’allegrìa è d’amore di a vita chì conta e brame di a scola, è aldilà e brame per un pòpulu è u s’avvene da custruisce in un bùffulu d’umanità.
U filmettu hè statu fattu à a mediatecca di I Fulelli duve a scola dà i corsi di lingua (parlatu, scrittura è lettura), di mùsica (ghitara, viulinu, batteria, pianò…), di cantu (pulifunia è canti da tutte e mamme), di ballu, o di teatru. Parechje scene sò state filmate dinù in u paese di a Penta di Casinca induve anu principiatu i primi corsi vint’anni fà.
Nata in u 2011, Scola in festa hè una custruzzione sodda è sèria, in cunvenzione cù a Cullettività di Corsica dapoi quasi u principiu, in 2012. Ma dinù cù u Cunservatoriu Henri Tomasi, a cumuna di Fulelli, u cullegiu di Fulelli. Hè un puntellu oghje d’attività è di creazioni per tuttu u rughjone casinchese.
Oghje anu riapertu e so porte, vi pudete scrive o scrive i vostri zitelli chjamendu a Mediatecca di Fulelli : 04 95 38 16 85 / 06 46 12 89 31 o scrivendu à Scola Corsa, BP 44, 20213 Fulelli.
Fate in furia chì a rientrata principia d’ottobre ! •
Rinsignamenti : www.scolainfesta.corsica
