700 personi, vestiti d’una maglietta arranciu, anu furmatu una grande catena umana nant’à a Corniche in Marseglia, di pettu à u Mediterràniu, accumpagnati da una vintina di battelli in mare. Ssa manifestazione di sulidarità s’hè passata u 20 di ghjugnu scorsu pè a ghjurnata mundiale di i refugiati, à a chjama di l’associu SOS Mediterranée chì scumbatte dapoi 10 anni contr’à l’indiferenza di l’Auropa di pettu à ssu drama cutidianu. Dapoi u principiu di l’annata, 1668 personi omancu sò morte o anu smaritu in mare, secondu à l’Organisazione internaziunale di i migranti. Vale à dì 637 personi di più chè in 2025. È parechji torna smarìscenu senza chì nimu ùn a sàppia.
5.514 personi cuntaminate da u virus Ebolà in Repùblica Demucràtica di u Congò, frà i quali 2642 personi ne sò morte dapoi u principiu di l’epidemia, di maghju scorsu. Sei pruvincie di u Congò sò tuccate è l’Uguandà dinù, cù 20 personi cuntaminate, frà e quale 2 morti. Ancu sè l’Uguandà hà dichjaratu l’epidemia spenta in fin di u mese di lugliu, u penseru ci hè d’una cuntaminazione chì si pò sparghje à tutti i paesi vicini.
U perìculu vene d’una schiatta scarsa pè a quale ùn esiste micca vaccinu. L’OMS hà dichjaratu u Congò in urgenza sanitaria internaziunale. Un pianu di 518 millioni di dòllari hè statu messu in ballu per luttà contr’à u virus è 70.000 vaccini sperimentali sò stati mandati per pruvà di fà piantà l’epidemia.
1.000 morti omancu, 4.000 personi sparite. U bilanciu di l’inundazioni à u Nepal è u Tibet hè tremendu è s’hà da ingattivisce torna. Hè a più grossa catastrofa à a fruntiera trà ssi dui paesi di l’Himalaya.
118.040 islandesi anu dettu di nò sta dumènica à i neguziati per entre in l’Unione aurupea, contra 105.339 ch’anu rispostu di sì à ssu referendum. U scrutinu era cunsultativu ma a prima ministra hà fattu sapè ch’ella rispetterà a vuluntà di l’islandesi. Vale à dì a quistione ùn si riponerà micca nanzu à u 2028. U nò hà guadantu per via sopratuttu di a pulìtica di a pesca chì raprisenta 7% di u PIB islandese. I giòvani pè u più (18-29 anni) anu a paura di perde a suvvranità nant’à ssu settore impurtantìssimu di a l’ecunumia di u paese.
74 pìccule tortughe cuanne sò nate in Corsica stu 25 d’aostu, nant’à a rena di Sagone. Forse ne nascerà di più sti pochi ghjorni, pènsanu l’osservatori, ma a nutizia hè digià bella ! U niddu scupertu, omu hà stallatu una prutezzione in giru da priserve e nàscite è qualchi simana dopu sò sbuccate e pìccule tortughe. L’evenimentu ferma abbastanza scarsu per smaraviglià ci !
12 à 15 millioni di pòveri in Francia, secondu u duttore Pernin chì lotta contr’à a precarità in Corsica. « Oghje vidimu i zitelli di e famiglie pòvere chè no accumpagnemu dapoi 20 anni. Vidimu morti, perch’è a precarità tomba. Vidimu ghjente cù mezi sempre più dèbuli è chì dèvenu sceglie trà manghjà, scaldassi, curassi o nutrìscesi… ».
Da leghje a so intervista cù Via Stella : https://bit.ly/3TbQFd3 •
