ARRITTI n’hà parlatu qualchi settimana fà, s’hè morta l’avucata curda Ebru Timkit dopu à 238 ghjorni di greva di a fame. Era accusata di difende i dritti di u so pòpulu è rivendicava un prucessu rispettosu di a demucrazìa. « U curagiu incredìbile di ssa donna conta una volta di più a grande determinazione di u pòpulu curdu è a piazza presa da e donne ind’è ssa lotta tremenda pè a libertà », avìa dettu tandu l’aurudeputatu Francescu Alfonsi. « Di pettu à un regime dittatturiale ch’affoca e libertà à e porte di l’Auropa, i Curdi sò in prima lìnea. Resìstenu, addunìscenu cù elli l’uppusizione demucràtica sin’à vince l’elezzioni cù decine di deputati malgratu un modu eletturale fattu per mètteli tràmpali da tutte e mamme. Anu bisognu di a sulidarità internaziunale », dicìa Francescu Alfonsi, presidente di u friendship curdu à u Parlamente aurupeu. U capifila di l’uppusizione demucràtica in Turchìa Salahattin Demirtas hè imprigiunatu cù d’altri deputati dapoi 5 anni dopu à a so vittoria eletturale. « Per Erdogan, ogni uppusante hè un “terrurista” è l’upinione internaziunale chjode l’ochji, u fascìsimu s’hè stallatu à Ankara è Istambul » dinunziava torna Francescu Alfonsi un mese fà. A settimana scorsa, hà chjamatu torna l’Auropa à scumbatte l’attache contr’à a demucrazìa di u presidente turcu Recep Erdogan. « A Turchìa di M. Erdogan cumula l’offese à i diritti di l’omi è e viulazioni di u drittu internaziunale » hà dettu l’aurudeputatu chì alerta contr’à « e minaccie pè a pace è a demucrazìa ». Dopu à l’invasione di a parte curda di a Sirìa, dopu à l’uperazioni militare in Iraccu, dopu à l’agressione ind’è l’acque territuriale greche è cipriane per pruvà di mette a manu nant’à e so riserve di gaz, Erdogan s’attacca à u Nagurno Karabakh, oghje chjamata Repùblica d’Artsack. Ssu paese indipendente hè sott’à a minaccia permanente di l’Azerbaidjan. A simana scorsa, hè statu torna bumbardatu è Erdogan porta u so sustegnu à l’invasore azerbaighjanu… Dui anni fà, a scrivana Asli Erdogan, premiu Simone de Beauvoir 2018, avìa alertatu l’Auropa : « Recep Tayyip Erdogan hè in traccia di custruisce un regime fascista. Hà custruitu a so pròpia forza militare, messu in ballu lege franchèndusi d’inchiesta ghjudiziaria per imprigiunà senza prove ghjente suspettati di crìmine contr’à u guvernu turcu. Hè un fascìsimu assulutu ! » N’importa quale pò andà in priggiò, n’importa quandu, esse cundannatu à perpetuità senza cunnosce u crìmine rimpruveratu. U sistema ghjudiziariu s’hè sfundatu in Turchìa, 4 000 ghjùdici sò stati rinviati, 2 000 imprigiunati, un ghjùdice hè statu ancu arrestatu durante un prucessu ! A Televisione hè cuntrullata à 100 % da Erdogan, dinù a stampa, e rete suciale, a pupulazione, l’educazione… Più di 200.000 personi sò stati arrestati dapoi a tentativa di rivolta militare di u 2016. 150.000 funziunarii sò stati rinviati ind’è a pulizza, l’armata, l’educazione, a ghjustizia, centinaie di mandati di merri sò stati cunfiscati, associi, sindicati, fundazioni sò stati sciolti… Hè fascìsimu.
