A crisa in Ucràina ingattivisce a situazione sin’à in Corsica cù un mondu agrìculu ch’era già abbastanza in crisa senza què ! Dapoi u 21 di marzu l’agricultori blòccanu i dui dipòsiti petrulieri di l’ìsula. Dinùnzianu una crèscita di 110 % di u gasoilu di i trattori è altri urdigni agrìculi è dumàndanu una presa in contu di e so difficultà. Frà e rivendicazioni, un ritornu à i prezzi di l’annata scorsa, è una lìmita di i prezzi da cunvene cù u Statu per permètteli di travaglià nurmalamente. « Ogni volta chè no pigliemu un trattore, perdimu soldi » dìcenu l’agricultori. L’azzione impedisce à e stazzioni di furnìscesi è s’ella dura, ùn ci serà più essenza da quì à pocu. Ùn sò soli à mughjà l’agricultori, sò in perìculu dinù i traspurtori è a situazione s’ella impeghjurisce torna ha da esse insuppurtèvule per tutti. I gruppi naziunalisti à l’Assemblea di Corsica pòrghjenu u so sustegnu à l’agricultori è chjàmanu à una presa in contu globale di i prublemi. Si n’hè parlatu durante a vìsita di u ministru Darmanin in Corsica sti pochi ghjorni, indifora di e discussioni per un novu statutu stituziunale, l’eletti anu dumandatu à u Statu d’accumpagnà cù misure urgente a situazione ecunòmica è suciale di a Corsica. •
