In core di l’estate, in Monte, tutti i capi di a dritta isulana èranu prisenti à l’invitazione di u so merru, u ghjornu di a festa patrunale. U ghjurnale Corse-Matin hà tandu publicatu uni pochi di ritratti mustrènduli fistighjendu, è à fianc’à elli, i capi di u PNC. Petru Casàtici ne hà fattu una puesìa…
« Ils sont venus, ils sont tous là… »
Quelli d’inghjò è di qualà
Accolti si sò in Monte
Ch’era scrittu’n’u ghjurnale ;
È stu fattu oru vale…
U sei d’aostu era :
Una chjam’à la « prighera »
Pè a Trasfigurazione
Di Ghjesù, a divusione,
Chì, originariamente,
A celebrava l’Oriente.
Eppò dopu l’anu stesa
À tutta a latina chjesa
’ncù Calistu u secondu,
Affinchè u sanu mondu
S’arricordi di Belgradu,
Quand’ellu fù liberatu,
È chì l’armata cristiana
Buttò à la luntana
U dragu Turcu invasore,
« In grazia di u Signore… »
Stu fattu si passò quandu ???
Un sei d’aostu, tandu…
È a trasfigurazione
Adopra la divuzione,
Cugnumentu u Signore,
Cum’è u San Salvatore…
« Ils sont venus, ils sont tous là ».
Quelli d’inghjò è di qualà :
Un ministru, diputati,
Senator’, merri, sò stati ;
È in u listessu spechju,
U merre di Purtivechju,
Salutendu manu dritta :
Pulìtica ??? Finta zitta…
Si preca San Salvatore
Chè sìa di gran’ghjuvore…
Ils sont venus, ils sont tous là,
È tòmbula, è tòmbula. •
