ARRITTI porghje u so sustegnu à i prigiuneri pulìtichi. Patriotti alarma à u pòpulu corsu di a situazione impeghjurita di trè frà elli, incarcerati in gattive cundizioni sanitarie. Contr’à tutte e cunvenzioni internaziunale di i diritti di l’Omu è contr’à dinù a so pròpia lege, u Statu francese piazza a ghjente sistematicamente in detenzione preventiva, allora chì i cartulari mòstranu bè chì ss’omi ùn sò periculosi nè in situazione di scappà. Ci sò cundizioni di rimessa in libertà, ch’ella sìa in detenzione for’di Corsica o cù un pedicagna per esse cuttighjatu, chì basta in a so situazione, induv’elli si dìcenu in più nucenti di i fatti rimpruverati.
Eccu u cumunicatu di l’Associu Patriotti chì dumanda a so rimessa in libertà.
” Faci piu d’un mesi chi sò incarciarati o assignati fora di Corsica parechji paisani nosci.
Da tandu a situazioni hè impighjurita par certi, ramintendu à ugnunu l’aspra rialtà di i prighjò francesi.
– Anghjulu Testa, 73 anni, soffri d’un’infezzioni urinaria. À tempu ni senti di u spinu è di u corpu. À malgrad’u parè di u mèdicu di fà lu uspitalizzà par avè curi adattati, hè sempri chjusu in una cèllula di Fleury-Merogis.
– Petru Baldacci, 58 anni, uspitalizzatu par allargia à i cìmici di i letti. Issu asempiu testimunighja di u frustu di i cèlluli di Fresnes.
– Ghjuvan’ Petru Santini, 77 anni chi sort’appena di u so pattifami di più di dui sittimani. Hè sempri incarciaratu in Fresnes.
I dritti di l’omu, quiddu di avè curi adattati ùn sò micca rispittati da a Francia chi ferma unu di i paesi auropiani i piu cundannati par mancanza è offesa à i dritti umani.
A Francia ùn cunosci chè i rapporti di forza.
Tocc’à tutti quiddi chì si riconòscini in a lotta pà a difesa di i prighjuneri pulìtichi di rifletta bè nant’à una strategìa cumuna e populari. Par contu nosciu, incù u rispettu di a diversità e di i sfarenzi ideològichi di ogni patriottu, ùn’emu mai abbandunatu a stòrica parola : forti uniti si uniti simu.
A lotta cuntinuighja !
Libartà par tutti I patriotti ! ” •