Paulu Santu Parigi serà u candidatu di Femu a Corsica à l’elezzioni Senaturiale di u 27 di sittembre pròssimu !
Militente di prima trinca, merre di Santa Lucia di Mercoriu dapoi 18 anni, primu presidente di a Cummunità di cumune Pasquale Paoli, a più grande intercommunalità di Corsica in core di a nostra muntagna, da 2017 à 2020, Paulu Santu Parigi hè un elettu di terrenu, è di ssa Corsica prufonda chì scumbatte cù e difficultà, luntana di i centri urbani è e facilità di u mondu mudernu. Manca di tuttu ssa Corsica quì, mezi di trasporti, telèfoni ch’ùn viàghjanu micca, cummerci pocu è micca, infrastrutture scarse. Puru, ci sò paisani chì pròvanu à campacci listessu, paisoli chì s’aiùtanu, agricultori, artisgiani, ghjente chì si danu di rimenu da mantene a vita ind’è l’internu.
Paulu Santu Parigi hè u purtavoce di ssa Corsica di a ruralità è ghjè ghjust’à puntu ciò ch’ellu deve esse un Senatore, un raprisentente di i territorii !
Eletti per sei anni, anu i stessi puteri legislativi chè i deputati. Vale à dì vòtanu a lege, cuntròllanu u guvernu, raprisèntanu e Cullettività Territuriale, è studièghjanu, nanzu à l’Assemblea Naziunale, i prugetti di lege ch’urganizèghjanu sse cullettività.
Cunsigliere territuriale Femu a Corsica, Paulu Santu Parigi hè dinù un militente di a càusa corsa è saperà difende tutti i so cartulari, dibàttitu custituziunale, statutu fiscale, libertà di i prigiuneri… i capatoghji è i cunfronti ùn mancheranu à u senu di st’istituzione ultragiacubina ! U naziunalìsimu corsu hà a pussibilità di cresce torna u so pesu in Parigi. L’elezzione à u Senatu serà pè u partitu Femu a Corsica un appuntamentu forte di a rientrata.
Paulu Santu Parigi principia a so campagna è anderà à cunvince i « grandi elettori » per ssu mese d’aostu. Augurèmuli ventu in puppa è dèmuci appuntamentu à u 27 di sittembre !