Zitelli, insignanti, parenti è militenti di a Federazione Scola Corsa anu fattu a so rientrata ! Un bùffulu di friscura è di speranza pè a nostra lingua. Di sicuru, Scola Corsa ùn face tuttu ella sola pè u riacquistu di a nostra lingua, ma l’impegnu hè maiò è porghje una dinàmica vera à tutta sta lotta sparsa dapoi più di sessant’anni. Da l’associu Scola Corsa stòricu, ch’ellu sìa di Corti o di Bastia, inditatu da u travaglione di Ghjuvan’Battista Stromboni è di Càrulu Castellani, à a Federazione oghjinca nata da ssa brama di riacquistu, passendu per tutti l’associ, i gruppi è i cullettivi chì si sò impegnati è per certi chì s’impègnanu sempre, senza smenticassi ben intesa di tutti l’insignanti militenti in u sistema educativu naziunale, i pueta, i scrivani, i pulìtichi da tutte e mamme ch’anu messu manu in pasta, a nostra lingua, malgratu l’affocu è a ripressione di u francese à livellu custituziunale, ferma sempre viva ! Forza è surgente di a nostra ànima, a lingua face pòpulu. A vuluntà nata in u 2020 di scrive tutta sta lotta ind’è l’insignamentu immersivu hà fattu rinasce l’impegnu d’uni pochi cù a speranza d’andà più in fùria chì u tempu ghjoca contr’à noi.
Cù sta cinquèsima rientrata, u retale Scola Corsa s’arradicheghja. Già cinque scole cù Biguglia, Bastia, Corti, Sàrrula Carcupinu è quist’annu Lucciana ! Scola Corsa conta 35 impiecati frà i quali più d’una trentina persunali educativi è 220 zitelli ! A dimarchja piglia forza in grazia à l’appoghju di e cumune ch’accòglienu è chì sustènenu in Bastia, cum’è in Biguglia per un dettu. Cù ogni zitellu, sò dui parenti, dui babboni è duie mammone, cumare è cumpare, zìe è zìi chì s’impègnanu ! Ghjè dì a dinàmica quant’ella cresce in fùria. E famiglie sò una di e chjave di a rièscita. Ghjè cù elle chì e scole tròvanu mezi, mèttenu in ballu attività perisculare, attelli di cantu, di ghjocu, di vita incù a lingua ! Hè a forza di sse scole assuciative d’insignamentu immersivu. A vita d’un zitellu hè nutrita di lingua francese da u svegliu a matina à u chjinà a sera. Imbuttatu cusì, ùn ferma più piazza à a lingua corsa, fora di qualchi parulluccia. Cù Scola Corsa, u zitellu ùn parla chè corsu, cù a so maestra, cù l’altri zitelli, cù i parenti quand’elli anìmanu attività. U tempu sculare, ma dinù tuttu ciò ch’hè à cantu, da chjucu chjucu, u zitellu ùn sente chè a lingua corsa sunnà à e s’arechjuccie. In classa, in a corte di ricriazione, per manghjà, per andà piscià, per fà a so siesta, per amparà, per ghjucà, per dumandà, per risponde, ùn si parla chè corsu.
Ma Scola Corsa hè vìttima di u so successu, sempre in cerca di lucali, di finanziamentu o d’aiutu cutidianu. Truvà un situ induve a federazione pò urganizà micca solu a prima classa, ma tutta a scola elementaria, ùn hè sèmplice. A difficultà dinù hè di truvà persunali sani sani corsofoni. Scola Corsa hà messu in ballu cù partenariati u so pròpiu sistema di furmazione, chì li permette d’appruntà l’anni à vene. A grande nutizia quist’annu hè statu (infine !) a cuntrattualisazione cù u Statu francese, chì dà novi mezi finanziarii. E paghe di dui maestri saranu prese in càrica da u Statu. Face prò, ma ùn basta micca chì u rìtimu di criscenza hè di 6 à 8 posti in più ogni annu. Bisognu ci hè dunque d’una parte pròpia di finanziamentu. Nant’à u bugettu quist’annu di 1,4 M€ ci vole à truvà 300.000 € di doni è di ricette di l’attività. Allora, per fà campà ste scole, sustenite à Scola Corsa, da ch’ella campi a nostra lingua ! •
