A ci l’anu fatta ! U Sporting Club di Bastia hà torna infiaratu Bastia è l’ìsula sana quist’annu dopu à una stagione di focu. Quarta cullata cunsecutiva è terzu tìtulu di campione, ùn parcorsu strasurdinariu in u ghjocu à pallò francese !
Compie u campiunatu (ferma un ùltimu scontru à ghjucà in Furiani) cù 18 vittòrie, 9 parità è solu 6 disfatte. Prima squadra à dumiciliu, prima attacca di u campiunatu cù 54 but marcati, prima difesa cù solu 27 but incasciati, 63 punti marcati (5 di più nant’à u so seguente, 11 nant’à u terzu) parechji ghjucatori primati frà i quali Sébastien Da Silva terzu migliore buttore (12), Anthony Robic, migliore passatore, Bastia s’hè lacatu in piazza tutti i so cuncurrenti fora di Quevilly Rouen ch’hà scumbattutu fin’à l’ùltimu cunfrontu, in Quevilly stessu induve u Sporting s’hè vintu ssu 33èsimu macciu impurtantìssimu di u campiunatu.
Cù a gioia di i ghjucatori, l’emuzione di u coach Mathieu Chabert, quella di i dirigenti daretu à u presidente Claudiu Ferrandi è u vicepresidente Petru Natale Luigi, u fervore di u pùblicu bastiacciu, u ritornu di l’infernu hè statu festighjatu tardi ind’è a notte malgratu u coprifocu !
Bastia hà validatu u so ritornu ind’è à fiura di u ghjocu à pallò francese, ma hà validatu bellu più chè què, un mèttodu, una visione di u ghjocu à pallò, luntanu di u foot business, chì viaghja cù bugetti dèbbuli, cumpensatu da un travaglione chì sà sughjucà l’omi è una passionne tremenda federatrice di tutte e forze di a sucetà corsa. A Corsica hè una terra di futbol, Bastia hè un club eternu chì sempre rinasce di l’infernu. Pè u pòpulu turchinu, pè u pòpulu corsu, à ringrazià à tutti, ghjucatori, coach, staff tècnicu, dirigenti, pè i belli sogni ghjunti realità ! Forza Bastia ! •