Più di 1.600 migranti sò morti o smariti in mare Mediterràniu dapoi u principiu di l’annata secondu l’Organisazione internaziunale pè e migrazioni (OIM). Ghjè u principiu d’annata u più murtale dapoi ch’ellu hà principiatu ssu contu macabru di l’OIM in 2014, cù un aumentazione di e vìttime di 150% per raportu à 2025.
Dapoi u 2014, sò cusì 26.000 personi à avè persu a vita in u Mediterràniu centrale. Un sciffru sottuevaluatu, millaie di personi ùn seranu mai cuntabilizate per via di tanti è tanti anneghi ch’omu ùn ricensa micca.
Frà sse vìttime di l’indiferenza di a cumunità internaziunale, si stima, secondu l’OIM è l’Unicef, trà 250 à 300 zitelli morti o spariti dapoi u principiu di l’annata 2026. I minori raprisèntanu quasi 17% di e personi chì pròvanu à francà u Mediterràniu centrale. 70% di ssi zitelli viàghjanu soli aumentendu a so vulnaribilità di pettu à tutti i perìculi scuntrati, mare gattivu, imbarcazioni fruste, traficanti, panna di mutori, sede, fame, fredu… Sò cusì omancu 3.500 zitelli morti dapoi u 2014.
È l’Organisazione di e nazioni unite ramenta ch’ellu hè un sciffru assai sottuevaluatu per via di tutti sti battellacci di furtuna chì si sfòndanu in mare senza chì nimu ne sia testimognu.
L’inseme di e strade migratorie in Mediterràniu (centrale, occidentale, orientale) impeghjurisce torna ssu bilanciu tremendu stimatu à 1.600 morti dapoi u principiu di l’annata 2026, è à 35.300 morti o spariti dapoi u 2014 dice l’OIM. D’altri raporti cum’è quellu di a fundazione Jean Jaurès, pàrlanu di più di 40.000 morti. Ma torna sottuevaluatu.
« Troppu ghjente risicheghja a so vita nant’à sse strade periculose » dice a diretrice generale di l’OIM, Amy Pope, « salvà vite deve esse una priurità assuluta. Avemu bisognu di sforzi cullettivi appughjati per impedisce i scrucconi è i passadori chì sfrùttanu ghjente vulenerèvule, è per sviluppà strade di migrazione sicure è regulare, da chì nimu ùn sia mai custrintu à piglià sse strade murtale ». L’OIM chjama à rinfurzà a cuurdinazione internaziunale per salvà vite in mare. E restrizzioni d’accuglienza in Auropa, a pressione messa nant’à associ cum’è SOS Méditerranée, u ricusu di i paesi aurupei suvente d’accoglie ssi battelli in i so porti, ùn sminuisce micca a vuluntà ferma di vene à stallassi in l’Eldorado aurupeu. È e cundizioni di e traversate vanu di male in peghju : l’Italia hà arregistratu 6.200 arrivate dapoi u principiu di u 2026, ci n’era statu 9.400 in u stessu tempu in 2025. U mancu di mezi ufficiali di ricerca è di salvezza hè indegnu. Ancu assai ch’ellu ci sò associ citatini cum’è SOS Méditerranée. L’associu hà salvatu 43.485 personi dapoi ch’ellu hà principiatu e so missioni in 2016. Hè in grazia à 120 benevulenti di 17 naziunalità sfarente chì sàlvanu, cùranu, pòrghjenu aiutu di prima necessità è sustegnu murale à sta ghjentarella suvente terrurizata, cutrata, famita è prufundamente malorosa. Ghjente da tutte l’età, stòrie tràgiche, ghjunte sin’à quì dopu à tanti guai è sciacure, è frà elle, sò e donne è i zitelli ch’anu suffertu u più. À bordu di l’Ocean Viking tròvanu duttori, infirmieri, mammane, sustegnu ghjurìdicu, cunsiglii. U partenariatu ch’ellu avia cù a federazione internaziunale di a Croce rossa è di u Curnettu rossu hè statu piantatu in 2025 per via di e restrizzioni bugettàrie. Puru, una ghjurnata di ricerca per l’Ocean Viking costa 24.000 €… Sustenite SOS Méditerranée. A so presenza ferma indispensèvule per salvà vite. •
