Èccula quì ! A biera di Natale di a brasserìa Pietra hè di ritornu ! Cù una bella ticchetta unta di u spìritu di Natale è una sòsula sempre ingorda.
« A biera di Natale hè d’una bella cumplessità arumàtica, spiècanu i so creatori, leendu a friscura acitosa di a clementina corsa à a rutondità di a fava Tonka. » A biera hè brassata cù una selezzione di trè malti è di farina castagnina corsa per dà un gustu ampiu è generosu. A cannella riduta in pòlvera cum’è a fava Tonka sò aghjustate in u fermentoghju, a fava essendu prima cuncassata è sposta in un saccu à infusione da tirane tutti i sapori. Cusì i prufumi si spànnanu nant’à una basa di cereale imbrustulite è fanu nasce note caramelizate, legere, d’amàndula-vaniglia-cannella ! Infine, s’aghjusta a pappina di clementine corse da tene tutta a so friscura è u so prufumu arumàticu.
« A clementina supraneghja è rinfresca a degustazione di ss’amber ale », dice torna a brasserìa ch’invita ugnunu à assaghjala.
A biera di Natale hà una bella roba rossa un pucarellu infundata, cù una bella schjuma zeppa è sapurita.
Ssa biera di Natale hè dispunìbule in buttiglia di 75 centilitri in a grande distribuzione, in lìnea, è in pressione in i cafè.
Bon Natale è bona biera à tutti ! •
