A cumuna di Ville di Petrabugnu hà inauguratu u so belvedere nant’à u situ di Campu Canicciu, magnìficu locu à 300 metri d’altitùtiine, da induv’omu pò scopre una vista nant’à a piaghja bastiaccia sin’à Biguglia, una parte di a valle di u Fangu, i paesi à l’intornu, u mare è e so ìsule di tempu chjaru. Sti monti capicursini chì suprànanu Bastia sò una richezza da u Pignu sin’à e Ville di Petrabugnu è più in là ver di i paesi capicursini. A cumuna di e Ville di Petrabugnu sà sta richezza è a mette in valore cum’ellu ci vole, da prisèrvene tuttu stu patrimoniu, l’ambiente è u circondu da u mare à i monti chì fàcenu un attrattività famosa.
Hè stata rinuvata cusì dui anni fà u ghjacciaghju di a Bocca Pruna custruitu à l’èpica genuvese, è u chjassu chì ci cunduce ; una riabilitazione riesciuta chì offre una bella girandulata à i spassighjatori. Si colla sin’à 600 metri d’altitùtine, ma a pruminata vale centu milla sforzi da ciò ch’omu pò scopre sopralocu di bellezza di a natura è di e mani di l’omu quandu ùn ci era nè cunghjulatori nè frigò ! L’anziani èranu astuti è ghjè un bellu mèritu chè di fà cunnosce stu bellu patrimoniu.
Cusì torna hà fattu a cumuna di e Ville è u so merre, Michele Rossi, per valurizà Campu Canicciu. U locu hè cunnisciutu da tutti i paisani è tutti ci sò andati da gode ssi paisaggi magnìfichi. Ma a rialisazione d’un belvedere hè mezu di permette à tutti, ancu quelli ch’ùn vòlenu o ùn ponu marchjà, di ghjunghje à scopre stu splendore ch’offre a nostr’ìsula. St’òpera vene à cumplettà a vuluntà di valurisasione messa in ballu cù u ghjacciaghju.
Cusì u 19 di maghju scorsu, ci era un bellu pùblicu per l’inaugurazione. U presidente di l’Esecutivu, Gilliu Simeoni, u prefettu di u Cismonte, Michel Prosic, u senatore Paulu Santu Parigi, u deputatu Michele Castellani, u presidente di a Cumunità d’agglumerazione, Luigi Pozzo di Borgo, merri, eletti, cunfratelli di u circondu è abitanti per apprezià st’òpera impressiunante. Perchè ci hè statu un travaglione impurtante da l’architettu Francescu Garnier di l’Agenza Erba Barona, cù scumesse tènniche è caruttagi nant’à u scoglilu per dà un balcone chì strapiomba una vista spetaculare.
Un invistiscimentu di 350.000 € da u Statu, a CdC, a cumuna.
Altra rialisazione a bella riabilitazione di a casa cumuna migliurendu a cunsummazione energètica, una spesa pùblica di 1,81M€, Statu, CdC, CAB è cumuna.
E Ville : una cumuna carca à prugetti ! •
FB.
