Trà l’8 è u 9 di maghju 1769, a Corsica hà persu a so indipendenza di fronte à i suldati di l’armata di u Rè di Francia. A giòvana repùblica chì smaravigliava l’omi di u Sèculu di i Lumi, ùn ci hè ghjunta à vince una di e putenze e più tremende di l’èpica, armata di fucili è cannoni, è aiutata ancu da mercenarii furesteri. I paisani corsi elli ùn avìanu chè u so curagiu è a so brama di libertà. È ssu curagiu, dicìa Voltaire, fù cusì grande « ch’elli fècenu un rampale di i so morti per avè u tempu di carcà daretu à elli. I so feriti sì michiàvanu à i morti per cunsulidà u rampale. Ùn si vede cose sìmule chè frà i pòpuli lìberi ».
A sèguita, si cunnosce. 20 anni di ripressioni tremende, 255 anni d’oppressione è denecu di a nostra identità è di e nostre rivendicazioni di pòpulu.
In u 1969, partecipendu di u riacquistu, u pueta Bartulumeu Dolovici, cù frà altri militenti cum’è Nunziu Grisoni, Prete Mondoloni, Elice Guerrini, decìdenu di fà rinasce u ricordu di Ponte Novu ch’era già statu cummemuratu in principiu di u sèculu, eppò s’era addurmintatu cù i guai di a disertificazione… In u 1972, l’associu U Ricordu di Ponte Novu hè creatu cù sta chjama lampata : « O Corsu, ùn ti scurdà di a to stòria ! » U muvimentu autunumista, l’ARC pò l’UPC, dinamizèghjanu l’appuntamentu è prestu prestu, sò tutti i naziunalisti chì si ritròvanu per cummemurà a battaglia è unurà quelli chì ci avìanu lasciatu a vita in u 1769. Ma u fracassu di l’affrontamentu trà naziunalisti in principiu di l’annate 90, affuca st’appuntamentu nustrale…
In u 2014, una squadra di giòvani di u rughjone decìdenu di rinvivisce l’associu. È dapoi, tutti l’anni, cù l’appoghju d’altri associ dinù, cum’è I Naziunali, ci hè sempre statu un accolta in Ponte Novu, da unurà l’antichi eroi cù una messa cantata, fiori à u munumentu di u ricordu, lampà di fiori in Golu, mostre, dibàttiti, veghje è ritruvate fraterne.
A battaglia fù ancu ghjucata durante parechji anni cù attori benevulenti è un scinariu di Bartulumeu Dolovici, làscita di u pueta sparitu in u 2009. U so scrittu in trè atti hè messu in scena da l’associu U Ricordu di Ponte Novu cù sonni è lumi nant’à u ponte insanguinatu… Bellìssima raprisentazione ch’omu vulerìa rivede…
A nova squadra di l’associu s’impegna per tramandà u ricordu di a battaglia cum’un patrimoniu nustrale da perpetuà, fà cunnosce a stòria è sparghje u spìritu di Ponte Novu, di rispettu è di fratellanza.
A Cullettività di Corsica hà accunciatu u locu è travaglia à prugetti di riabilitazione di u ponte.
Cù u s’aiutu, quellu di a merìa di Castellu di Rustinu è quellu di l’Istitutu di studii di e civilisazioni è i spazii mediterrànii (Ineacem), l’associu s’hè impegnatu dinù à a rialisazione d’una decina di pannelli in corsu, francese è inglese, stallati in giru à u ponte per cuntà i fatti è u cuntestu di a battaglia.
L’associu si rivendicheghja a-pulìticu : Ponte Novu appartene à u pòpulu sanu. U scopu hè di fà ch’ogni Corsu si riconnosci in a so stòria. Un travagliu di riacquistu culturale è stòricu. •
Infurmazione è cunttati : www.facebook.com/ricordu.pontenovu
