A San Ghjisè hè festa di i bancalari è i bancalari di Corsica anu vulsutu rende umagiu à unu di i soi oghje smaritu. Abel Raclot era artisgianu d’arte à A Croce d’Ampugnani. Hà fattu un travaglione per riabilità u mòbulu corsu in Corsica, dà a voglia à i ghjòvani d’impegnassi anch’elli per valurizà ssu bellu patrimoniu. È cusì, hà furmatu mondu ghjòvani corsi, frà i quali Pantaleone Alessandri di Nucariu. Cù ellu hà rigalatu un librone nant’à u legnu è u mòbulu corsu*, un travagliu di memoria è di cunservazione di u patrimoniu nustrale, sìmbulu forte di a nostra identità. N’hà rinvivitu mòbuli è tàvule d’Orezza, ma dinù creatu altari è magnìfichi purtoni di ghjesgie ! Suvente di manera benevulente è sempre appassiunnata. Avìa mani d’oru, l’amicu Raclot ! L’umagiu chì li hè statu resu stu sàbatu in u Centru di Furmazione di i lavurenti di Furiani (CFA) hè più chè meritatu. Un attelu di bancalari porta ormai u so nome. Onore a so memoria di bancalaru, ma dinù quella di tutta una prufessione d’artisgiani d’arte ch’anu cuntribuitu à scrive u riacquistu di l’annate 70 è scumbàttenu sempre da ch’ella cuntinueghji à rinasce è à sviluppassi una prufessione nòbile.
Abel hà principiatu à travaglià u legnu avìa 14 anni, hà amparatu a zilugrafìa, fattu una scola d’arte in Parigi, pò si n’hè vultatu in Corsica in u 1968 per rinvivisce u mòbulu corsu in a so semplicità è a so bellezza. Hè statu frà i primi militenti di l’ARC à u latu d’Edimondu Simeoni è hà campatu u so militentìsimu stallèndusi in paese, in cor’di a Castagniccia è di a pieve d’Orezza. Tandu era u solu attivu di u so paese di A Croce d’Ampugnani. Era a so manera di luttà contr’à a disertificazione di l’interiore. Innamuratu di a muntagna, partìa per longue spassighjate à scopre l’alte cime cù u so canucciu, Tobi. Cunniscìa piante, scoglii, è muntagne cù u so nome corsu è quelli chì l’accumpagnàvanu avìanu drittu à lezziò di geugrafìe è di cultura ! « Credu chì l’ànima di u pòpulu corsu hè quì » dicìa Abel Raclot. S’impegnava senza risparmiu nu e dimarchje assuciative di u mondu paisanu. A fiera di Pedicroce è i s’attelli, a rinàscita di a fiera di u Pratu, a creazione di l’associu Mobulu Corsu, a valurisazioni di u legnu corsu,.. era a so manera di luttà. U so pròpiu attellu in a Croce parìa un museu induve èranu infrugnati mondu mare è maraviglie.
S’hè spentu Abel Raclot u 17 di ferraghju 2018 à l’età di 88 anni. Un bellu umagiu li hè statu resu in Furiani, bramendu chì ss’attellu chì porta u so nome furmerà mondu ghjòvani bancalari di talenti, duppiati d’un bellu spìritu corsu. •
* « Bois et meubles corses, legni è mobuli corsi ». Edizione Cismonte è Pumonti.
