S’hè spenta ind’è a notte di u 4 à u 5 di sittembre, Marie Christine Bernard-Gelabert, Direttrice Generale di i Servizii di a Cullettività di Corsica.
ARRITTI prisenta e so cunduleanze afflitte à tutti quelli tocchi da ssa nutizia tremenda. Era una donna d’eccezzione, intelligente è umana, una funziunaria dinù d’eccezzione, prufessiunale è fida. Mancherà assai à a Corsica.
Eccu l’annunziu di ssa trista nutizia è l’umagiu di u Presidente di u Cunsigliu Esecutivu di Corsica.
Ripusate in pace. •
U missaghju di Gilles Simeoni
« Avemu amparatu inc’una tristezza infinita ch’ella s’hè spenta sta notte Marie-Christine Bernard-Gelabert, Direttrice Generale di i Servizii di a Cullettività di Corsica.
Cumpatimu à u dulore di u so maritu Michel, di i so figlioli Jeanne et Jean-Toussaint, è di tutti i soii.
A Cullettività di Corsica perde una funziunaria d’eccezzione è a Corsica una figliola appassiunata è di prima trinca.
Era a nostra amica, un amica fidata, esigente, impignata notte è ghjornu in u so travagliu, primurosa sempre di l’interessu generale è di l’ètica di l’azzione pùblica.
Sò fieru d’avè travagliatu incù ella è fieru dinù ch’ella sia stata affiancu à noi tutti, à u serviziu di a Corsica.
Sò oghje tutti l’elette è l’eletti, è tutti i persunali di a Cullettività di Corsica è di e so Agenze è Uffizii à esse in dolu è à pienghje à Marie-Christine.
Ferma è firmarà impressu u so surrisu è tracciatu u solcu apertu sott’à a so Direzzione.
Elle était heureuse de travailler avec nous, élus et agents de la Collectivité. Elle a choisi de continuer à le faire jusqu’aux tous derniers jours, avec un courage, une pudeur et une détermination dont nous ne prenons la totale mesure qu’aujourd’hui, à l’aulne de la terrible nouvelle. Marie Christine est partie, mais son sourire, sa voix, et son empreinte continueront à nous accompagner. » •