Perchè chì vi site interessata à stu sughjettu, chì face assai cuntroversa, di u sviluppu di i centri cummerciali in Corsica ?
Sò sempre stata interessata da stu sughjettu, dapoi a facultà. Di 2016, aghju scrittu un primu articulu nant’à l’impattu ch’ella hà avutu nant’à u centru cità a chjuditura di u Géant Casino di a Rocade in Bastia, per via di u tempurale. I mesi di chjuditura avianu permessu di ranimà un centru cità muribondu. Dopu, per l’apertura di l’Atrium in u circondu aiaccinu, aghju publicatu una tribuna chì hà fattu riagisce assai. Durante u mo mandatu à l’Assemblea di Corsica, di sittembre scorsu sò intervenuta per chì a creazione di a Cullettività unica sia l’uccasione di fusiunà e duie cummissione dipartimentale chì danu l’auturisazione cummerciale. Averebbe permessu à u presidente di l’Esecutivu di co-preside sta cummissione regiunale cù u prefettu, è chì a putenza publica regulessi infine l’auturisazione. Ma u Statu ùn hà datu seguitu à sta dumanda.
U mudellu di a grande distribuzione hè in crisa à u livellu internaziunale, fora di a Corsica. Cumu spiecate stu paradossu ?
A grande distribuzione in Francia si hè fundata nant’à una logica di stensione territuriale, vale à dì una vera culunisazione per via di l’ipermercati nant’à tuttu u territoriu francese cù una distruzzione à pocu à pocu di i paisaghji è di i centru cità. In Corsica, i centri cummerciali si sò sviluppati assai è prestu sti pochi anni cum’è s’ellu ci vulia à culmà un ritardu storicu. In dece anni sò stati auturizati l’equivalente di 39 stadii di ballò, invece chì in Francia è à u livellu internaziunale u mudellu cummencia à fà vede i so limiti. U famosu ipermercatu cù e so insegne cumplementarie in periferia di e cità ùn viaghja più cum’è prima, ci hè un vultà di e piccule è medie surfazie di prussimità. Hè prubabile ch’ellu si sfiati da per ellu da quì à qualchì annu.
INTER : « In dece anni sò stati auturizati l’equivalente di 39 stadii di ballò… »
Ùn serà un testimoniu sta tindenza di un’incapacità di i puteri publichi à regulà stu generu di stallazione ?
Quandu chì circa 90 % di i prughjetti si buscanu un avisu favurevule da a parte di e cummissione dipartimentale d’accunciamentu cummerciale, si pò cunsiderà chì i puteri publichi ùn sò micca in capacità di regulà e stallazione. Ma à le volte hè assai difficiule di ricusà un prughjettu per un elettu lucale chì à spessu hà da creà impieghi è dà l’impressione di sviluppà u territoriu, puru s’ella hè vera chì un empiegu in una grande surfazia ne face smarrisce trè in centru cità. Ùn pensu micca ch’ellu si possa aspettà un qualcusellu di ste cummissione fora di cuntinuà à auturizà i centri cummerciali longu à e dumande, malgradu i voti à le volte sfaruvevuli d’attori publichi assai impurtanti, cum’è a cullettività di Corsica o i raprisentanti d’intercummunalità ma chì ùn si buscanu a maghjurità.
Chì attrazzi publichi puderianu esse messi in ballu per ammestrà megliu l’accunciamentu cummerciale ?
À parè meo, ci vole prestu à adunisce tutti l’attori cuncernati, i prumutori di prughjetti, e cumune è l’intercummunalità, e cità maiò di e microregione culpite ma dinù l’architetti, l’accunciadori, i cummercianti… Deve l’esecutivu ingagià una grande riflessione chì puderia esse un puntu di partenza per un ducumentu quadru per sapè induve è quantu surfazie cummerciale seranu sviluppate in l’anni chì venenu. Stu ducumentu puderà ghjuvà di basa à a struzzione di e dumande d’auturisazione in cummissione. In u listessu tempu, ci vole à ingagià azzione cuncrete da ridinamizà i cummerci di i centru cità, favurizà i spiazzamenti, megliurà u staziunamentu per ricunquistà una populazione chì hè per sfughje i centru cità. Parechje cità sò riesciute à fà a transizione, è d’altri territorii chì anu sperimentatu pratiche alternative. Face vede chì ghjè pussibule è chì puderiamu fà da esempii in stu duminiu.
A cullettività di Corsica hè cumpetente in quantu à l’accunciamentu di u territoriu. Cumu puderia intervene, forse per via di u Padduc, per arregulà megliu stu generu di stallazione ?
Ùn hè micca cù u Padduc chì s’hà da arregulà u prublema. Definisce un mudellu di sviluppu ma ùn hè micca adattatu à u casu specificu di e grande surfazie. Hè per quessa chì ci vole à imptrunisce si di sta prublematica cù l’attori cuncernati, chì osinnò passeremu accantu à una di l’imbusche di l’anni à vene. Cù a fundazione Coppieters, contu di apprufundisce stu sughjettu urganizendu una grande cunferenza da quì à pocu per invità tutti l’attori cuncernati à dibatte.
L’assenza di ducumentu d’urbanisimu in certe cumune ùn serebbe micca una manera di lascià si spareghje oiù faciule l’auturisazione ?
U sviluppu di simuli centri cummerciali duverebbe esse scrittu in i ducumenti lucali d’urbanisimu. Ma à spessu, ùn ci sò. Per e cumune chì ùn ne anu, ùn impedisce nunda. Ch’ellu esisti un ducumentu o micca, l’auturisazione sò accurdate in 90 % di i casi, ciò chì face vede à chì puntu ùn ci hè regulazione è nisunu dispusitivu da canalizà è raziunalizà l’offerta. U sviluppu cummerciale hè necessariu in Corsica cum’è in altrò, ma prupongu di mette un quadru à st’affare, di fà scelte cullettive chì ùn impattanu e generazione nove è danu vere perspettive di crescita, fendu la finita cù un mudellu predatore di e risorze è di l’omi.
Antonia Luciani.
