55 morti. Hè l’ùltimu bilanciu di l’attacca rùssia in Komychouvakha. Si cerca sempre decine di personi sparite… « L’attacca contr’à Komychouvakha mostra quant’elli sò presi in mira i civili è l’infrastrutture civile da i Rùssii. St’ùltimi ghjorni, e bombe anu tocchu un centru di curamenti palliattivi pè i malati in fasa terminale à Dnipro, un ospidale in Kharhiv è stallazioni ferruviare. In Dnipro, un attacca contr’à una gara hà tombu 15 civili è n’hà feritu 14 altri a dumenicata scorsa » hà dettu u cummissariu à i diritti di l’Omu di u Cunsigliu di l’Auropa, Michael O’Flaherty. « A Russia aumenta l’attacche contr’à l’infrastrutture energètiche à l’orlu di l’inguernu… tutta l’Ucràinia hè tocca è nisun regione ùn hè tranquilla, minacciendu i civili, è cacciènduli i mezi per campà durante l’inguernu, frà i quali sò tocchi i zitelli, e persone anziane, e persone e più dèbbule » dice torna u Cunsigliu di l’Auropa chì chjama à a sulidarità cù l’Ucràinia, à furnìsceli un aiutu d’urgenza, à rinfurzà u sustegnu à e persone spiazzate, à mette in ballu una ghjustizia di riparazione è à rinfurzà l’azzioni in favore di una pace fundata nant’à u drittu internaziunale.
7 paesi aurupei (a Francia, l’Italia, a Spagna, u Reame Unitu, a Grècia, u Portugal, a Bèlgica) pròvanu à urganizà una mubilisazione cumuna per dà una dimensione di più à a cuntestazione suciale contr’à a vita cara… U 3 di nuvembre scorsu, si sò aduniti inseme urganisazioni sindicale, cullettiviti contr’à a vita cara, cullettivi pè u drittu à l’alloghju, associ di a giuventù (studienti è liceani). Appròntanu grande manifestazioni di manera cuurdunate pè u 20, u 21 è u 22 di nuvembre pròssimu. Dumàndanu u blucchime di i prezzi di l’energia è di l’alimentazione, a guaranzia di u drittu à l’alloghju, l’aumentu di e paghe è di e pensioni. In Francia, ghjè l’intersindicale di a giuventù chì appronta sta mubilisazione, vale à dì sindicati studientini è liceani, cullettivi citatini cum’è quellu di e magliette gialle, è i sindicati di salariati.
1,6 millione torna per manifestà u 5 di nuvembre in Francia, secondu à CGT (675.000 secondu à a pulizza). Hè a più grossa mubilisazione dapoi u principiu di a cuntestazione. Ma a mossa di stu sàbatu 7 di nuvembre, hà adunitu assai di menu : 250.000 secondu i sindicati (146.000 secondu u guvernu). U primu ministru hà annunziatu l’urganisazione d’una « cunferenza suciale » u 9 di nuvembre à Matignon.
283 millìmetri d’acqua, vale à dì un mese è mezu di piossa in 24 ore… anu custatu a vita à un coppiu in Portivechju è arruinatu ponti, strade, casamenti, vitture, stallazioni d’acqua è d’elettricità… i disguasti sò tremendi è custeranu parechje decine di millioni… omancu ! •
