« Mi chjamu Tavignanu » dice u fiume cù a voce di Ghjuvan’Francescu Bernardini di a Fundazione Umani. « Vengu d’amparà chì una cundanna senza para hè stata prununciata contr’à mè. Ne tremu di stupore, ne tremu di stumacheghju. Ma corru sempre. Avete decisu, avete ghjudicatu chè mi ci volerà oramai suppurtà in e mo girivolte u pesu, a minaccia, di millaie di tunnellate di rumènzula è di terra tigliosa. Sti veleni m’addèntrenu à u più prufondu di u mo èssere. Saraghju cundannatu à traspurtali, à spàrghjeli pè a più grande disgrazia di tutti. I sparghjeraghju à tutti i mo riparii, ma dinù sin’à e stese freatiche chì sò u vostru tesoru u più preziosu, a vostra lea di vita. Nunda ùn serà risparmiatu. Nimu ùn si ne surterà salvu. Ne eiu. Ne voi. Invece di purtavi a vita cum’è l’aghju sempre fatta, mi cundannate à pòrghjevi a morte. Mi cundannate à purtà a malatìa. À tutti è per tutti, aghju sempre datu più di quattru millioni di metri cubi d’acqua linda ogni annu. Oramai, mi ci volerà à riceve 170.000 tunnellate di lozzi ogni annu : hè a vostra risposta, hè u vostru verdettu.
I fiumi ùn piètanu micca. A terra ùn pieta mica. Ma qualcosa mughja in voi. Ùn u sentite micca ? A vi dicu cù savviezza. A vi dicu in piena cuscenza : sè vo ùn sentite micca un fiume chì chjama, sè vo ùn sentite micca un fiume chì pienghje. Sè vo ùn sentite micca un fiume chì mughja, ghjè chè vo avete disamparatu a lingua di a vita ! Aspettu un pòpulu. Aspettu un pòpulu chì parla per mè. Chì si pesa per mè. Aspettu un pòpulu chì lotta per mè.
Per avà mi chjamu sempre Tavignanu, è Tavignanu vogliu campà. Aghju cunfidenza in voi. »
Parlerebbe cusì u Tavignanu, s’ellu pudia parlà ? Cosa ci dicerete ? Sarebbe cusì calmu, prontu à pardunà, o più inzerghitu è bramandu rivolta ? Ghjuvan’Francescu Bernardini li hà scrittu ssa chjama in un clip induve a curegraffa Maria Maddalena Pinna è e so ballerine, bàllanu ind’è u fiume per sprime ssa preghera, à dui passi di u locu induve un impresa vole sputà i so mullizzi. Cù tutti i lochi abbandunati, ùn ci serà statu chè u Tavignanu per accoglie ssu prugettu ? Hè u secondu fiumu di Corsica dopu à Golu. Aggrotta un ecosistema riccu in biodiversità cù spèzie endemiche prutette, parechje sò minacciate.
A parte a più bassa di u locu hè classifficata in Znieff (zona naturale d’interessu eculògicu fonisticu è floristiccu). Hè dinù Natura 2000 dapoi 15 anni. U fiume da l’acqua à una grande parte di a piaghja urientale, u so rolu hè fundamintale per l’agricultura. In Ghjuncaghju, si pruietta un centru di lozzu ch’hà da ingulìscesi centunaie di tunnellate di mullizzi è terre tigliose à l’annu, nant’à e sponde di u fiume, in un locu poccu stàbule induve a terra s’hè già sfundata. Dapoi u 2016 u Cullettivu Tavignanu Vivu si batte per impedisce ssu prugettu ch’ùn hà sensu in stu locu quì. Cù a Fundazione Umani è Terre de lien Corsica – Terra di u Cumunu, u cullettibu hà pruclamatu i Dritti di u Tavignanu. Pudete ziffrà sta chjama per salvà u fiume. Ziffrate è fate ziffrà a dichjarazione di i Dritti di u Tavignanu : tavignanu.corsica •
