S’hè spentu u nostru amicu Luigi Giacomoni di Rùtali. Avìa 76 anni anni. Pueta è scrivanu pè a so cara pieve di u Nebbiu, Luigi era u babbu di u nostru amicu Paulu Natale Giacomoni, elettu è terzu aghjuntu in Rutali. Era stitutore di mistieru, appassiunatu di storia è di cultura, è ben intesa di lingua corsa. Hà suminatu à longu à a so vita sta passione è st’amore di a Corsica è di a so ghjente.
Partecipava assai à l’emissione Dite a Vostra nant’à RCFM è s’impegnava pè u so paese di Rùtali ch’ellu tenìa cusì caru. Scrivìa assai dinù pè u paese è a pieve, nant’à blog o siti, avìa publicatu un librettu « Cunniscenza di u Nebbiu » chì testimugneghja quant’ellu avìa studiatu a nostra storia è i chjassi è paesi di u so rughjone.
Luigi era un omu di stintu è di valori, lascia un viotu pè i soi ma dinù per tutti quelli chì l’anu cunnisciutu è appreziatu.
À Maria Rosula Giacomoni, nata Ferrari a so sposa, à i so figlioli Paulu Natale, Catalina è Maria, i so figliulini Ghjàcumu Battista, Francescu Luigi, Lucca Antone, Petru Maria, è Elia, i so fratelli è surelle, è tutti i soi adduluriti, Arritti manda e so cunduleanze afflitte.
Riposi in pace o Luigi quassù in Paradisu. •
