S’hè spenta in u so paese di Marignana, Lisabedda Stella, nata Ceccaldi à l’età di 84 anni.
Lisa era a moglie di Iviu Stella, naziunaliste di e prim’ore, frà i fundatore di a lotta armata, merre di Morsiglia smaritu in u 2012 à l’età di 69 anni.
Era a surellona d’Anna, Francesca è Paulu Ceccaldi, di l’associu Scopre in Marignana, è a zia d’Emma è di Matteu, merre di Marignana.
Donna di carràtteru è di cunvinzioni, degna è generosa, impegnata pè u so paese, pè a ghjustizia suciale è pè i diritti di u pòpulu corsu, Lisa s’era spatriata giòvana per fà i so studii cum’è tutti i Corsi di tandu.
Quand’ella volta in Corsica, scontra in Bastia l’amore di a so vita, Iviu Stella. Sparterà cù ellu tutte e so lotte, da e notte d’angosce à a prigiò, da e riunioni da tutte e mamme, è i coll’è falla nant’à Corti in sta vitturetta chì puzzava a sigaretta, sin’à e càriche di merre ch’ellu avìa presu Iviu in u 1995 in u so paese di Morsiglia. Hà datu a so parte di turmenti è di sacrifizii pè a lotta.
Più giòvana, Lisa avìa militatu dinù in u sindicalìsimu, à a CFDT, era impegnata pè u dirittu è l’emancipazione di e donne, più tardi quandu a Corsica campava ore nere in principiu di l’annate 90, avìa difesu u dirittu à a vita, à u senu di u cullettivu di u Manifestu pè a vita di e donne corse.
Lisa ùn avìa micca zitelli, ma i so nipoti è niputini èranu i so figlioli ch’ella tenìa cusì caru.
Ritirata in u so paese di Marignana dapoi qualchi annu, s’impegnava à u senu di a Cunfraternità Sant’Antone Abbatu induv’ella hà campatu a so fede ch’era prufonda.
I s’amichi cunfratelli l’anu accumpagnata in una bella ceremonia ssu 25 di sittembre in Marignana, cù una messa detta da u prete Charles Eko Nkoa è cantata da l’amica Battista Acquaviva.
Eccu, Cara Lisa… ti ne sì andata ancu tù… mandemu basgi affettuosi à e to surelle Anna è Francesca, u to fratellu Paulu, i to nipoti Emma è Matteu, i to niputini, tutti i parenti è l’amichi adduluriti.
Riposi in pace o cara, ci ritruveremu. •
