Sì e scole immersive cummìncianu à esse cunnisciute ind’è u paesaghju isulanu, èranu assai felice di scopre Ciuccialingua, una ciucciaghja immersiva esciuta in u 2023 in Aiacciu in u quartieru di Mezavia. Vene à allargà a pruposta immersiva è permette d’andà à salvà a lingua nostra à a surghjente, chì hè più fàciule pè i ciucci d’amparà la. Permette dinù d’incità i parenti à cuntinuà nantu à a vìa di l’immersione pè i so zitelli.
Sperendu chì per l’avvene serà pussibule d’amparà in immersione da a ciucciaghja à u liceu è aldilà. Pè u so numaru di fin d’annata, Arritti ne hà parlatu incù Stella Mondoloni, fundatrice e direttrice di Ciuccialingua.
Chì hè u vostru percorsu studiantinu è prufessiunale ?
Dopu à un bascigliè scentìficu, mi sò iscritta in studii corsi (studii di a lingua è di a cultura corsa) à l’Università di Corti. Incù l’uttenzione d’issa licenza, aghju seguitatu un master di prufessore di e scole bislingue. Aghju insegnatu in una scola immersiva.
Accumpagnata da un educatrice di zitellucci, mi sò furmata à a prima zitellina è aghju apertu a mo ciucciaghja u 2 di maghju di u 2023.
Cumu hè vinuta l’idea di Ciuccialingua ?
A prima zitellina hè a basa fundamentale di l’Omu. Custituisce tutte l’amparere ch’averanu un impattu adultu. C’èranu scole immersive (pùbliche o private) ma ùn c’èranu ancu ciucciaghje in immersione di lingua corsa. Tandu mi sò dettu chì mancava un prughjettu immersivu in a prima zitellina.
Apre a Ciuccialingua era una sfida maiò postu chì ùn basta micca à parlà corsu.
Difatti, ci vole à tene contu di tutti i bisogni di i zitellucci è prupone un ambiu di qualità. Hè statu assai duru dinù chì una ciucciaghja deve risponde à règule specìfiche di bastimentu.
Hè a mo prima ciucciaghja dunque aghju travagliatu notte è ghjornu per issu prughjettu. Aldilà di u prughjettu immersivu, vulia prupone una antra manera di pinsà a prima zitellina. Aghju creatu dunque un stabilimentu di 145m2 induve u zitellu si pò sviluppà à nivellu di u linguaghju ma dinù à nivellu psicumutore è affettivu.
Cumu si porta a ciucciaghja dapoi a so lampera ?
A ciucciaghja si porta propiu bè dapoi a so apertura. U bilanciu dopu à più d’un annu è mezu d’apertura hè pusitivu.
Sò assai fiera chì Ciuccialingua, hè una ciucciaghja privata tandu ùn aghju ricevutu nisunu aiutu finanziariu (micca suvenzione). U materiale, l’aghju compru incù e mo ecunumìe. Vuleria dì dunque à tutte e giòvane generazioni chì incù a vulintà è un travagliu tremendu tuttu hè pussìbule.
Accogliemu i zitelli à pàrtesi di 3 mesi sin’à 3 anni. Oghje avemu 18 famiglie scritte è ogni ghjornu accogliemu 12 zitelli. E dumande d’iscrizzione sò numerose. Simu digià cumpletti pè a rientrata di sittembre 2025.
Dapoi u principiu sò sustenuta da u mo maritu è a mo famiglia ma dinù da a mo cara squadra.
Quale ci hè ind’è ssa squadra ?
A mo squadra si cumpone di sette personi : una rifarente tècnica (educatrice di zitellucci), una rifarente salute (infirmiera puericultrice), dui ausiliarii di puericultura, un CAP prima zitellina, una persona in amparera CAP prima zitellina è una persona in amparera educatrice di zitellucci. À principiu ùn avia micca aiutanti (persona in amparera) è à longu andà sò pussuta à riclutà duie cullaburatrice di più in amparera.
A mo squadra hà a doppia cumpetenza : prufissiunale di a prima zitellina ma dinù cursofuna. C’era dunque doppia difficultà pè u riclutamente, ma sò riesciuta quantunque à avè una bella squadra di prufessiunale.
Oghje chì ghjè oghje, pensu ch’avemu creatu una bella famiglia di Ciuccialingua.
Possu dì chì dapoi u principiu e mo cullaboratrice ùn sò mai assente è chì a mo squadra m’hè fida. Ci vedimu ancu fora di Ciuccialingua.
Sò cuntenta assai chì a lingua corsa, « lingua di u core », rinvivisce quì in quantu à « lingua di u pane », tandu quì dinù hè una bella riescita.
I vidite evuluà i ciucci ?
Iè, vedimu ingrandà i ciucci. Ghjè un piacè tremendu di sente parlà in lingua corsa ciucci cusì, l’avvene hè quì. I zitelli sò tutti diventati cursofuni.
Certe famiglie ùn pàrlanu corsu, tandu sò i zitelli chì pòrtanu a lingua corsa in casa. Dumàndanu ancu à i parenti di cuntinuà issa tramandera. E famiglie mi dumàndanu assai robba pedagògica da pudè amparà u corsu.
Pè e famiglie cursofune ghjè una manera dinù di mustrà à i figlioli chì a lingua corsa pò campà in tutti i duminii.
I so parenti sò cuntenti ?
E famiglie sò cuntente assai : pè a trasmissione di a lingua corsa ma dinù pè u serviziu di qualità chì hè prupostu. Simu veramente primurose di u benestà è di a securità di i zitellucci.
E famiglie c’arricumàndanu à d’altre è ne simu assai fiere.
Da quì à pocu, e prime generazioni di Ciuccialingua anu da entre in scola. Spergu chì l’offerta immersiva di u rughjone puderà cunvince e famiglie di Ciuccialingua, da pudè cuntinuà l’immersione dopu à a ciucciaghja.
Chì puderia cunvince parenti a fà a scelta di l’immersivu piuttostu chì a vìa d’una ciucciaghja clàssica ?
A contu meu, a scelta di l’immersione hè a sola manera di mantene a nostra lingua. U zitellucciu hà da esse in un bagnu linguìsticu tutta a simana, l’amparera s’hà da fà in furia.
Da esse veramente cursofunu ci vole chì a lingua corsa sìppia intesa è parlata di manera cuntìnua. « A ogni lingua a so raprisentazione mentale. » Un zitellu bislinguu averà di più raprisentazione mentale di u mondu, postu chì hè statu arrichitu da duie culture.
L’immersione hà da rende u zitellucciu bislinguu, tandu e so faculte cugnitive seranu più impurtante.
A tramandera di a lingua corsa hè una richezza chì permette di mantene u nostru pòpulu vivu.
Cumu vidite l’avvene di Ciuccialingua ?
L’avvene di Ciuccialingua u vecu incù zitelli chì cuntinuèghjanu à parlà corsu in ciucciaghja è in altrò. Forse chì Ciuccialingua averà un ghjornu surelluccie. Per mè seria di più fàciule chì avà cunnoscu u funziunamentu à mente.
Spergu dinù chì ci seranu d’altri fundatori di ciucciaghje immersive.
Pudemu sperà un sviluppu di Ciuccialingua nantu à u territoriu, in Cismonte forse ?
Sò stata cuntattata da certe merrie cismontiche dunque perchè micca un ghjornu apre ne in Cismonte !
U bilanciu ?
Sè duvia fà un bilanciu dapoi l’apertura di Ciuccialingua hè chì hè un prughjettu riesciutu è sèriu. I zitelli sò cursofuni è e famiglie cuntente assai. Sette persone sò impiegate per via d’issu prughjettu è hè una fiertà. E dumande d’iscrizzione sò sempre di più numerose è l’interessu per l’immersione di a lingua corsa in ciucciaghja c’hè. •
