Ssa chjama era stampata nant’à u librettu di u famosu cungressu di l’ARC, di u 17 d’aostu 1975. Vale à dì qualchi ghjornu nanzu à l’evenimenti d’Aleria. Ghjè à st’ùltimu cungressu chì Edimondu Simeoni è l’ARC anu lampatu à u pòpulu corsu una chjama à resiste in un discorsu ghjuntu celebru. Ind’è ssu librettu ci era dinù sta chjama à salvà a lingua corsa. Ferma sempre d’attualità.
« Oghje u Corsu hè una lingua da tutti ricunnusciuta. Compiu u tempu induve i so nemici li appiccicàvanu u tèrmine di « patois » ! Per tumbala più prestu ! U Corsu, a sènteli, ùn era una lingua !
I so nemici ? Ùn anu ancu spustatu ! U più maiò, u più accanitu : u Statu francese !
Ellu vutò ind’u 1951 a lege Deixonne, chì permette l’insignamentu facultativu di e lingue regiunale. Ci volse 22 anni di strapazzi per chì ssa lege fussi stesa à u Corsu. Ma ùn ci scurdemu : una lingua scacciata di a vita, una lingua ch’ùn ghjove à nunda, hè una lingua morta ! È u Corsu hè scacciatu da ogni locu. Fendu nice di salvala u Statu, in fatti, a strangola !
Altri menici : i ghjurnali francesi. Elli vòlsenu, assin’à eri, facci crede chì u ghjàcaru aiaccinu fraiarebbe sempre u cane bastiacciu. Per’elli, sinònimi (chì inricchìscenu a lingua francese) sarìanu stati velenu fine pè u Corsu.
Infine, nemici, certi partiti pulìtichi chì chjàppanu l’òrdini in Parigi. Ramintàtevi. Quandu Scola Corsa, st’imbernu, dumandò un insignamentu ubligatoriu, qual’hè chì si alzò per oppònesi ?
Parechji militanti di ssi partiti, veri Corsi è fratelli nostri sò favurèvuli à s’insignamentu. I capizzoni ùn anu primura ! È sè a lingua more, crepatura !
Ùn dimentichemu : i parenti corsi chì pàrlanu francese à i so figlioli. Amici di a lingua corsa ?
Oghje, a nostra lingua hè sempre in puntu di morte. Oghje sbàrcanu à battellate furesteri cun balisgie piene di una cultura pronta à stuffà a nostra.
È simu custretti à vince a battaglia culturale.
A sapete : persu a lingua avèdeci robba nostra !!
Quandu i Corsi averanu capitu, ùn ci sarà tanti cari di mamma ! U guvernu li farà piazza !
Tandu u Pòpulu Corsu averà vintu a so prima vera battaglia. Averà assicuratu l’avenire !
Parlate Corsu ! In casa è fora !
O’ca sinò simu lecchi ! » •
