Ciernobil : Chì ne serà di a Corsica ? avia scrittu Arritti l’8 di maghju di u 1986. Èramu una decina di ghjorni dopu à a catastrofa è sapìamu chì a Corsica era stata tocca dapoi una simana… ancu sè l’autorità francese dicìanu di nò. « Misure sò state prese guasi in tutta l’Auropa centrale, da u nordu à u sud. Cuncèrnanu i prudutti freschi. L’Italia cuperta da u nùvulu da 1u à u 3 di maghju, s’hè imposta à ùn cunsummà micca u latte frescu, i legumi, i frutti, durante una quindecina di ghjorni à pàrtesi di u 3 di maghju (…) ùn hè un capriciu sè u ministeru di a securità pùblica face ghjittà in e rumènzule tutta a pruduzzione agrìcula di u paese »… scrive u nostru settimanale. Hè u primu di una longa longa seria d’artìculi, d’inchiesta, di denunziazione ch’Arritti hà publicatu. Ùn avemu piantatu di parlà di Ciernobile à longu à sti quarant’anni. Hè stata una lotta diffìciule. Avemu circatu à accumpagnà a ricerca di a verità. Hè forse un andatura di u nostru settimanale : brame di verità, di ghjustizia, di sulidarità cù quelli chì sòffrenu. Ci vole à arricurdassi tandu, nanzu à ch’omu sàpii ciò ch’ellu ci avia rigalatu Ciernobile, i malati anu sufferta di dinegu è disprezzu. Ci hè vulsutu parechji anni nanzu à ch’elli sìanu ricunnisciuti cum’è malati. Perch’è ancu i duttori ùn sapìanu ciò ch’ella era. Ùn si cercava a tiròida sistematicamente cum’è oghje è si mettia nant’à u contu di a depressione u statu di nervosità, u caràtteru instàbile, l’umore azezu, e difficultà à cuncentrassi, a fatica permanente, l’ingrussamentu, u tremuleghju, i batticori, a traspirazione eccessiva… certi, in più d’ùn esse più in bona saluta, anu persu cusì u travagliu, si sò spiccati cù u so maritu o a so moglie, ùn anu pussutu allivà currettamente i so figlioli, tutta a so vita è quella di i soi hè stata ciambuttata… Una prima vittòria hè stata d’esse ricunnisciuti cum’è malati è micca cum’è azezi… Eppò pè e pattulugie e più grave, ci hè vulsutu dà di pettu à ste malatie, dulori, tossa, voce arghita, pena per rispirà, eppò operazione, trattamenti penosi, càmera spiumbata, medicamenti à vita chì vi fàcenu ingrussà ancu manghjendu pocu, è tandu sguardu di l’altri è tutti i disturbi chì s’accumpàgnanu in u cutidianu eccètera… M’arricordu di sta giuvanotta, 15 anni dopu à a catastrofa, quandu no fecìamu riunioni cù l’amica Michèle Rivasi, troppu prestu smarita, è l’amichi dinù di a Criirad è di l’associu di i malati di a tiròida (AFMT)… a giuvanotta s’era datu di curagiu in Bastia per piglià a parulla. Avia 17 anni è a làcrima à l’ochju, a golla strinta, ci avia palisatu « hè diffìciule quand’omu hà 17 anni di dì à i s’amichi chì vi dumàndanu di sorte fora, innò sò stanca, ùn possu micca… avete u laziu di scialàvila cù elli, di ride, di campà, è ùn pudete mancu, site cum’una vechjetta »… Chì sarà diventata sta zitella ? Quantu cum’è ella anu avutu a so giuventù sacrificata ? Eccu ciò ch’hè stata a Corsica à longu à sti 40 anni, strazii è suffrenze pè i malati. Hè per elli ch’avemu scumbattutu, trà riunioni, manifestazioni, spertìzie, cunferenze, à studià i raporti notte è ghjorni per pruvà d’avvanzà…
È oghje à chì ne simu ? Tutta sta suffrenza ùn hà da ghjove à nunda sè e lezziò ùn sò micca ritenute. A Corsica s’hè battuta pè avè un registru di i càncari è hè stata una pìccula vittoria. Ma ùn basta micca, ci vole chì l’eletti si ne ghjuvèssinu da curà a salute di u so pòpulu. Eppò ci vole à mette in ballu o fà chì u Statu adopri prutucolli d’intervenzioni precizi in casu di cuntaminazione, chì tutt’ognunu sàpii ciò ch’ellu deve fà da prutege a ghjente è l’ambiente s’ella accade torna una catastrofa… •
