S’hè spentu u nostru amicu caru, fratellu di e nostre lotte, Ghjuvanni Franceschetti. Avìa 86 anni è era malatu dapoi qualchi annu.
Anzianu ghjucatore di u Sporting Club di Bastia, era sustenitore accanitu. Hà fattu di u sport u so mistieru à fiancu à a ghjuventù ch’ellu hà accumpagnatu tutta a so vita, postu ch’ellu hè statu prufessore d’educazione fìsica è spurtiva è sustenitore di i ghjòvani ghjucatori. Hà ghjucatu da a Divisione d’Onore à a Lega 2 in u so club di core di u skeubeu, cum’ellu li piacìa à dì, induv’ellu hà ghjucatu dinù un di i so fratelli Ghjorghju. Hè statu intrenore da a squadra di Divisione d’Onore ind’è l’annate sessanta. S’hè impegnatu dinù à a Lega corsa di u ghjocu à pallò è hà travagliatu parechji anni à u senu di a Direzzione di a Ghjuventù è di i Sport. Hà partecipatu à a creazione di l’associu di l’anziani di u Sporting.
Militente fidu.
Ghjuvanni era un militente fidu dapoi l’Unione di u Pòpulu Corsu induv’ellu s’era impegnatu assai, pò di u PNC, infine di Femu a Corsica. Era un sustegnu d’Arritti, attaccatu à i valori nustrali, generosu è umanistu. Ci hà da mancà assai cù u so spìritu stuzzicaghjolu, u so sguardu spampillulante, u so surisu chì palisava a so gentillezza è l’amore ch’ellu sparghjìa in giru à ellu.
À tutti i soi, parenti è amichi, mandemu e nostre cunduleanze afflitte è fraterne.
Riposi in pace o Ghjuvà, fratellu caru. •
