U Cumitatu di u Rughjonu di l’Alta Rocca hè natu da a vuluntà di militenti naziunalisti di u locu chì si ricunnòscenu in a dimarchja « Pè a Corsica ». Hè un spaziu di dibàttitu è di travagliu. Si vole dinù forza di pruposte è s’ellu ci hè bisognu hè prontu ancu à scuzzulà per fassi lea trà u territoriu è l’eletti di l’Assemblea di Corsica. U Cumitatu hè apertu à tutti da prumove un veru sviluppu per ssa pieva di muntagna è s’impremurisce di tutti i so bisogni : alloghju, precarità, agricultura, ambiente, strade, educazione, salute, personi anziane, ghjuventù, lozzi, acqua, patrimoniu, energìa, ecc.
Hè cusì ch’ellu hà creatu u ghjurnalu « L’Altra strada » è una pàgina Facebook.
L’Associu A Funtanedda s’impegna nant’à e prublemàtiche di l’ambiente dapoi u 1992 in Alta Rocca, cù parechje realisazioni in parechji duminii, da a securità à a gestione di l’acqua, a presenza di servizii pùblichi, a scola, ecc.
Ultimamente hà urganizatu di marzu in Auddè un scontru nant’à u sviluppu, a gestione è a prutezzione di u Cuscione, è aldilà, di i grandi siti di l’Alta Rocca. Hà dinù urganizatu una cunferenza di stampa d’aprile nant’à e rumènzule ghjittate ind’è a machja fendu pruposte à a Cumunità di e Cumune di l’Alta Rocca.
Tremindui dunque, anu vulsutu adunisce l’attori per sparghje a riflessione nant’à u trattamentu di i lozzi in Corsica è circà di capisce cum’ellu s’opereghja. U presidente di l’Uffiziu di l’Ambiente in càrica di ssa quistione à l’Esecutivu di a Corsica, Francescu Sargentini, era presente cù uni pochi d’eletti di a maghjurità territuriale : Rumanu Colonna, Julien Paolini, Jean Jacques Lucchini, Pierre José Filipputti. Dinù Fabiana Giovannini è Matteu Ceccaldi (elettu à Marignana) raprisentàvanu u deputatu aurupeu Francescu Alfonsi, fora di Corsica è ch’hà fattu sapè u so sustegnu à tutti. Presenti torna parechje Cumunità di cumune, è dinù l’associ di l’ambiente cum’è Zeru Frazu, U Levante, Tavignanu Vivu, u cullettivu di Vicu, quellu di Prunelli è parechji altr’associ.
Dopu à a diffusione di u filmu di Jean Michel Schiavo « Zeru Frazu ? », l’eletti anu fattu a prisentazione di u pianu di a Cullettività di Corsica, è l’associ anu puntatu da ch’ella avvanzi più in furia a messa in ballu di a scelta selettiva. Tutti ne sò d’accunsentu, più anderà in furia, è menu ci serà u bisognu di accatastà u lozzu in i centri di accatastime (stockage), tutti s’accòrgenu per dì ch’ellu ci tocca à travaglia ci inseme. Tutti ricùsanu l’incinerazione è u sepellimentu di i lozzi. A scelta ferma a sola è vera suluzione.
Bell’iniziativa chì ne chjama d’altre per sensibilizà di più in più Corsi. A Funtanedda brama d’urganizà un grand’evenimentu per sparte e sperienze nant’à u trattamentu di u lozzu cù l’altre regioni o ìsule di u Meditterràniu. Sarà un antra è bella iniziativa !
ARRITTI.
