Si ne parla dapoi u settanta… ci sò stati ogni tantu qualchi prova, ma ùn ci hè statu manera di custruisce una vera filiera d’insignamentu immersivu in lingua corsa sinamente avà.
A brama l’avìanu uni pochi dapoi un pezzu è, cum’è tutte l’avventure umane, ci hè vulsutu elementi ditirminante per fà sorge è sbuccià u prugettu ! Eletti vulintarii pronti à mette in ballu i mezi ch’ellu ci vole, militenti di terrenu chì mèttenu manu in pasta, insignanti chì pìglianu scumessa, parenti in brama di vede i so ciucci ciuttà in un veru bagnu linguìsticu, tutti, si sò aduniti da cuncretizà infine ssu bellu prugettu ! S’appoghja nant’à a storia è u parcorsu di l’associu Scola Corsa, natu di 1971, è nant’à a federazione Eskolim, ch’adunisce tutte e scole assuciative d’insignamentu immersivu in Francia, da a Brittania à l’Alsazia, passendu pè u Paese Bascu, a Catalogna o l’Occitanìa. Ne mancava unu ind’è a famiglia di e lingue regiunale chì scumbàttenu in prima lìnea dapoi 50 anni è più : a Corsica ! Oghje hè fatta, cù Scola Corsa, Eskolim conta u membru chì li mancava per ingrandà.
Di pettu à un Statu chì ci face guerra è mette tràmpuli à pruduce i corsufoni ch’hà bisognu a sucietà corsa per fà campà a lingua corsa, ci vole à armassi di curagiu ma dinù d’attracci i più perfurmanti. L’insignanti corsufoni chì èscenu da u sistema pùblicu oghje ùn sò abbastanza numarosi da pudè nutrisce u sistema pùblicu ! Qualsìasi i mèriti è u travaglione fattu ind’è l’insignamentu pùblicu da militenti chì scumbàttenu à u cutidianu, mancava ss’urdignu di più, quellu assuciativu, per aiutacci à appruntà i bisogni di dumane.
Hè fatta ! S’àprenu e duie prime scole assuciative d’insignamentu immersivu sta rientrata di sittembre 2021, in Biguglia è in Bastia ! Hè un mumentu ch’hà da cuntà ind’è l’annata à vene. Una dimarchja lanzana, un passu chì si dicerà stòricu da quì à qualchi annu, quandu i primi zitelli di a filiera Scola Corsa esceranu u so bascigliè in stacca è puderanu spàrghjesi, nè l’insignamentu, in i media o in u mondu di l’impresa per tramandà a lingua corsa in a sucietà !
Face parechje mesi avà ch’omu si travaglia à ssu mumentu, cù sèriu è cù passione. U scopu hè di custruisce un urdignu soddu è perduràbile. Pè i dui siti i zitelli sò scritti, l’insignanti numati, e cundizioni materiale ottimale cù l’aiutu di e cumune. A Rettrice hè stata infurmata. U Presidente di u Cunsigliu di l’Esecutivu hè statu sullicitatu. L’alliniamentu di pianetti ùn pudìa esse megliu. Avà tocca à voi. À voi, amichi lettori, à i vostri, parenti, amichi, vicini, di dacci u colpu di manu necessariu pè u funziunamentu di sse scole : pacà l’insignanti è l’aiuti materni, urganizà l’attelli è e surtite sculare, cumprà u materiale pedagògicu supplementarii ch’ellu ci volerà ogni annu, eccètera.
Una chjama maiò hè lampata, è ùn ci hè pìcculu donu : « centu pochi fàcenu l’assai » ! Allora cari amichi lettori, fate un donu à l’associu Scola Corsa ! Diventate benfettori, è da quì à qualchi annu, quand’è no faremu valè i risultati è e rièscite di Scola Corsa, puderete dì « ci eru ancu eiu ! »
Spannemu inseme a nostra lingua ! •
Fabiana Giovannini.
I rispunsèvuli di Scola Corsa
Ghjiseppu Turchini, presidente di Scola Corsa, Ghjuvan’Francescu Stefani, tesurieru, Antonia Luciani, secretaria, Francescu Alfonsi, Lisandru De Zerbi, Diunisiu Luciani, Micheli Leccia, Marc’Andria Castellani, Ghjuvanna Julien, Nadina Nivaggioni, Brandon Andreani, Rumanu Giorgi, Dumènicu Delporto, Muriela Beltran, Natale Tomasi, Fabiana Giovannini – Alinu Gherardi, presidente di Scola Corsa di Biguglia, Marilyn Massoni, tesuriera, Francescu Leonelli, Secretariu – Pasquale Castellani, presidente di Scola Corsa di Bastia, Lionel Dumas Perini, tesurieru, Laura Ferrandini, secretaria. •
I vostri doni in sceccu sò da addirizzà à : SCOLA CORSA, BP 12, 20416 Ville di Petrabugnu
Pè i versamenti di banca (puntuali o permanenti) : IBAN : FR76 1200 6000 3030 1536 3801 094
Per tutta infurmazione a nostra pàgina Facebook : Scola Corsa – Naziunale
Cuntattu : [email protected]
