À mumenti, ci simu ! A quinta edizione di a Currilingua si corre sàbatu u 17 d’ottobre pròssimu. Eccu tuttu ciò ch’omu deve sapè per partecipà o sustene a corsa.
Principiata in u 2021, u scopu hè di core à prò di a lingua corsa fendu u giru di l’ìsula in una corsa di sulidarità da mantene viva a nostra lingua !
• Si corre, o si marchja, o s’incuragisce nant’à u parcorsu, o per quelli ch’ùn pòssunu partecipà, si sustene cù soldi chì e ricette anderanu à finanzà azzioni à prò di a lingua corsa.
• A prima edizione s’hè fatta da Borgu à Sulinzara, a seconda da Aleria à Bonifaziu, a terza da Bonifaziu à Sartè, a quattrèsima da Sartè à Cavru, è infine quist’annu, si corre da Cavru à Aiacciu !
• Ci saranu quist’annu 39 chilòmetri ma basta à scrìvesi per un chilòmetru ! A scrizzione hè di 100 àuri (chè vo fate unu o parechji chilòmetri). Pudete corre dinù à parechji, chì si ponu scrive associ, club spurtivi, imprese, scole, sindicati, vicini, cucini, cum’è vo vulete ! (fora di i partiti pulìtichi).
• Oghje ne simu à 80 scritti. Parlate in giru à voi da chì amichi si scrìvenu anch’elli !
• I partecipanti si trasmèttanu à ogni chilòmetru un testimone. Ogni annu hè rializatu di modu benevulente da un paisanu o un artisgianu, di manera à impegnà un òpara cullettiva ! A prima volta era fattu di scopa, a siconda in farru, a terza di scubidù, a quattrèsima cù un àlbitru è quistu annu sarà fattu di coghju, d’alivi è di bronzu. Una vera òpara d’arti rializata da dui artigiani di u rughjonu aiaccinu : Dumènicu Santoni è Anthony Foïs. Anu creatu dui esempiarii : unu ch’ellu tenerà l’associu cum’è ricordu è un antru da mette in
aghjudicazione (vindutu à u più uffrante).
• U cumpare di a quarta edizione era Ghjuvan’Carlu Papi. Quist’annu hè una cummara : Diana Saliceti, imabasciadrice di a nostra lingua è di a nostra cultura, chì mette a so nuturietà à u serviziu di a Currilingua !
• U parcorsu ? 3 chilòmitri in Cavru sin’à u ghjiratoghju di Baracconu par andà in Suaredda, siconda cumuna francata. Si laca da cantu a territuriale per viaghjà à nantu à e strade paisane (D103 è D3). Si riunghje per Bastilicaccia. U principiu di a strada hè cumuna d’Òcana è prestu si tocca à Bastilicaccia davanti à a merrìa pè rigalà da beie è da manghjà. Da nutà l’impegnu maiò di tutte sse cumune paisane, tutte pronte à dà soldi, parsoni par corre è appruntà cullazione. Dopu, da Bastilicaccia si ritrova una vìa di circulazioni sottu à a cumpettenza di a Cullittività : a pista verda pè i pidone è e bissiclette. Ssa pista maiò porta in cor’ d’Aiacciu, cinquèsima è ùltima cumuna cuncernata da u parcorsu di quistu annu. Si ghjunghje davanti à a gara è tandu, pà a prima volta, drentu à una cità maiò. À parte da quì u circuitu cunduce da un locu simbòlicu à un antru : a gara, a prefettura, l’assemblea di Còrsica, a stàtula di Fred Scamaroni, u ritturatu, u liceu Fesch, a stàtula di Paoli, a catedrale, u marcatu, u palazzu di i cungressi, u museu Fesch è infine a merrìa d’Aiacciu.
Eccu ! Dice Micheli Leccia :
« Aspittemu mori aienti par corra o par sustènaci u longu d’a strada è ben intesu un finali da u museu Fesch à a mirrìa cù parechji dicini di curridori, in una ambienza fistiva. Di règula duvarìani participà parechji pulìtichi, u vicariu è u cardinali, parechji scoli è ben intesu associa, cumircianti, gruppa d’amichi… Da nutà u spìritu militanti d’u gruppu Sulana chì, inveci di facci spenda solda in una sonò, priferi, di sirata, cantà senza à mezu à l’aienti è dacci piuttostu solda è participà à a corsa currendu.
À tempu à ’ssa pìccula animazioni ci sarà di sicuru da bì è da manghjà (di rigalu) è par sustena u cullittivu sempri a pussibilità di cumprà sciarpi è baretti. Aiò currimu pà a lingua, adunìmu ci sulidarii è fistivi cù aienti varii è forzi vivi ! » •
-> Per inscrivesi à A Currilingua : https://www.parlemucorsu.corsica/cc/a-currilingua/









