Arritti hà digià fattu passà u messagiu : sàbatu u 17 d’ottobre pròssimu, ci sera a cinquèsima edizioni di a Currilingua, a corsa à prò di a nostra lingua ! Sta volta, si parte da Cavru à 2 ore dopu meziornu di fronte à a merria. Ci serà una piantata ver di quattr’ore in Bastilicaccia, davanti à a merria dinù nanzu di ghjunghje in Aiacciu cù parechje tappe, è infine l’arrivata si face ver di 7 ore è mezu di sera piazza Foch, davanti à a merria torna. Ci serà tandu una stonda di spartera cù u gruppu Sulana. Da sapè dinù chì a cummare di l’edizione 2026 hè l’artista canterina Diana Salicetti.
Cunniscite u scopu di ssa dimarchja creata da u Cullettivu Parlemu Corsu. S’assumiglia à ciò ch’ellu si face in Paese Bascu cù a Korrika, o in Brittagna cù a Redadeg. A ghjente si scrive per corre un chilòmetru o di più, è tene un testimognu ch’ognunu si passa di manu in manu, marchendu cusì a sulidarità di tutti pè a nostra lingua. Ghjè una manera di spàrghjesi un tesoru cumunu, è di sensibilizà à u bisognu di parlala è di tramandala. A ricetta di tutte e scrizzioni ghjoverà à aiutà azzioni à prò di a lingua corsa. U sonniu, hè di fà cum’è i nostri amichi baschi chì mubilizèghjanu millaie di personi. Sò chjamati à scrìvesi, individui, o associ, club spurtivi, sindicati, imprese, scole, gruppi d’amichi o famiglie. Certi vènenu cù a so maglietta, da fà sapè u so sustegnu à a lingua corsa. Arritti s’hè scrittu è averà da corre frà l’ùltime tappe ind’è a fine di a ghjurnata. Affaccàtevi à raghjùnghjeci !
A scrizzione hè di 100 àuri. Hè una bella iniziativa cum’ellu hà sà custruìscele u cullettivu Parlemu Corsu è u so presidente Micheli Leccia. Sciaccamanèmuli ! •
Cuntatti è infurmazioni : parlemucorsu.corsica / 06 78 65 20 72
