Patriottu di e prim’ore, à fiancu à noi tutta a so vita militante, Simon Fazi di Sant’Antone di A Ghisunaccia, si n’hè andatu. Sò parechji i fratelli patriotti chì l’aspèttanu in Paradisu per ammentà inseme tante lotte è castichi. Simon era di prima trinca, omu di pace è di cunvinzione. Amicu fidu, innamuratu di a Corsica, di a so stòria, di a so lingua è di a so cultura. Agricultoru, appassiunatu di a so terra, hà scumbattutu dinù cum’è sindicalistu. Face parte di sse generazioni ch’anu sappiutu dà di pettu à i guai è l’inghjustizie quandu ùn era fàciule. Hè statu ancu imprigiunatu à tortu in u quadru di a cusì detta « pista agrìcula », inventata da u sistema ghjudiziariu per caccighjà i naziunalisti. Strappatu à a so vigna è à u so bestiame, purtatu in Parigi, hè statu imprigiunatu parechji mesi è inculpatu durante 20 anni nanzu chì u Statu culuniale ricunnosci ch’ellu s’era sbagliatu. Puru, hè sempre firmatu ùmile è arrittu.
A to moglie, i to figlioli, a to figliulina, tutti i t’amichi è fratelli di lotta, ti piènghjenu. Riposi in pace o Simon. •
