Sò compii i lavori ! A marina in Bastia hè stata inaugurata stu luni 23 di ghjugnu pè a San Ghjuvà. Una bella festa pè una bellìssima rialisazione !
L’avemu già detta nant’à Arritti, Bastia si trasforma è di bella manera !
A Marina chì dà tuttu u so splendore è u so rinomu à a cità bastiaccia, hè stata rinnuvata è ghjè una bella rièscita. Ghjuvellu patrimuniale, l’inaugurazione cascava ghjustu pè a festa di San Ghjuvà, appuntamentu nustrale pè i Bastiacci. In gràzia à sta pietunisazione di u Vechju Portu, u nordu è u sud di Bastia sò ormai liati à longu à una pruminata chì parte da Toga sin’à in l’Arinella, è permette d’attraversà tutta a cità francèndusi a piazza San Niculà, pò a calata di i Martiri, u Vechju Portu, cù u Mantinum insù, pò u bellìssimu balcone di l’Aldilonda è in fine u Spassimare chì passa davant’à Ficaghjola è finisce in l’Arinella. Di chè rende à Bastia a so piena vucazione di cità aperta nant’à u mare ! Cù sta visione chì lea u passatu è l’avvene di Bastia, a municipalità rileva scumessa di fanne à tempu una cità muderna chì risponde à e brame di a mubilità dolce. U scopu era di trasfurmà l’abitùtuine citatine, ridà gustu à e spassighjate, lachendu da cantu a vittura, è riunisce dinù i Bastiacci sinamente à oghje spiccati trà a vechja cità è i so quartieri sud. È l’anu capita è apprezièghjanu assai sti Bastiacci ch’anu fattu soiu a pruminata è si gòdenu ogni ghjornu numarosi, à pedi o in bicicletta, di ssu bellu parcorsu à longu à u mare.
« Hè un mumentu impurtante, di fiertà è di grande rispunsabilità » hà dettu u merre di Bastia Petru Savelli. « Bastia ùn hè mai stata cusì bella, cusì grande chì quand’ella s’apre à u Mediterràniu » li hà rispostu u presidente di l’Esecutivu, Giliu Simeoni. « Un portu, locu d’agrottu quand’ellu ci hè a timpesta, ma dinù locu apertu di scontru, di cumunicazione, di scàmbiu »… s’hè rallegratu dinù u Vescu di Corsica.
A festa di San Ghjuvà stu 23 di ghjugnu hè stata dunque bellìssima, cù a partecipazioni di l’associu U Mercà, di i cumercianti di A Marina, è ben intesa di a pupulazione ghjunta numarosa per sparte ssu bellu mumentu d’allegrìa. Da una calata à l’altra, tuttu u Vechju Portu era neru di mondu in bullore festivu da i passi è veni di a ghjente.
Parte sana di u prugettu, u Puntettu hè statu frà e prime rialisazioni di a municipalità, natu da a vuluntà di a magiurità naziunalista di salvà u più vechju quartieru bastiacciu. È dì chì l’anziana magiurità vulìa strughje ssu spaziu tìppicu di Bastia, bellu patrimoniu piattu daretu à u Vechju Portu ! S’omu duvìa ritene una sola cosa di e rialisazioni naziunaliste dapoi u 2014, ghjè d’avè salvatu U Puntettu, induve hè nata Bastia sèculi fà. Ma rialisazioni ci n’hè d’altre, è ci ne serà torna !
In quant’à a festa di stu 23 di ghjugnu, dopu à a messa in San Ghjuvan’Battista, hè stata ufficialmente inaugurata
A Marina rinnuvata in prisenza di l’eletti ben intesa è di tutti i partenarii di u prugettu. A piazzetta piglia u nome di Piazzetta di a Marina. U Vescu di a Corsica, u Cardinale Francescu Bustillo, li hà datu a so benedizzione cù tutti i so battelli. A prucessiò di San’Ghjuvà dopu hè partuta da a ghjesgia sin’à a Conca Marina per salutà u Santu Sacramentu in presenza di numarosi cunfratelli. Pò a prucessiò hà ripigliatu sin’à a Calata Albert Gillio duve s’hè incesu u fucarè di a San’Ghjuvà fendu drittu à una bella tradizione bastiaccia !
In a nuttata, un filmettu nant’à a memoria di a Marina, « a voce di u mare, memoria di a Marina » hè statu prughjettatu nant’à i casali. Infine un focu d’artifice hà compiu sta serinata di festa cù u ballu di a San Ghjuvà urganizatu da l’associu
U Mercà nant’à a nova piazzetta in forma di teatrinu induve omu pò pusà è gode di u paisagiu è di a ghjente chì prumena sott’à a prutezzione di u celebru doppiu campanile di San Ghjuvà !
Salutemu sta rialisazione magnìfica è tutti i sforzi di a municipalità. Certi anu forse bruntulatu un pocu à u principiu, cù a zerga di perde piazze di stazziunamentu… ma hè stata una bella scelta di caccià e vitture parchighjate quì. Oghje u Vechju Portu hè messu in valore di bella manera è tutti, cumercianti, abitanti, turisti, ùn ponu truvacci chè piacè ! Àrburi, spazii, u locu hè resu à a pruminata è spampilla di tuttu u so splendore ! Sciaccamanemu sta rialisazione è andemu à tirà dui passi nant’à u Vechju Portu ! •
