Stu 26 d’aprile pochi sò i paesi chì si sò arricurdati di a catastrofa nuclearia di Cernobile… Eppuru ! Mena sempre ancu oghje. Quellu ghjornu, u mondu s’hè francatu d’una catastrofa ancu di più tremenda è irremediàbile pè a civilisazione umana tale è quale a cunniscimu.
U cuperchjulu di u reattore 4 hà saltatu da a pressione d’acqua chì crescìa, ma splusione nuclearia ancu assai ùn ci n’hè stata. È in grazia à i lichidatori (a corcia ghjente rechisiziunata per copre in fùria in fùria u cumbustìbule nucleariu messu à l’aria lìbera) a catastrofa ultima hè stata impedita. Dinù, in grazia à i malorosi ch’anu scavatu un tunellu per rèndesi sott’à u reattore è sculà una sciappa d’astracu per pruvà di ritene u famosu corium… a lava ultraradiuattiva chì si trafora tuttu è ch’ellu ci vulìa fà piantà. St’omi quì sò eroi anònimi simu pochi à sapè u so sacrifiziu !
35 anni dopu, Cernobile hè sinònimu d’un sarcofagiu spaventosu per ricopre u reattore, milliardi di dòllari cunsacrati di manera regulare da ch’ellu ùn si tafoni è ch’ella ùn scappi a radiuattività chjosa nentru. Sinònimu d’un territoriu cundannatu per 24.000 anni, cità mutighjine duve a vita s’hè piantata un 26 d’aprile à 1 ora 23 di mane. Sinònimu di centinaie di millaie di personi spiazzate ch’ùn sò mai più vultate ind’è elli. Sinònimu di suffrenze umane, vìttime scurdate chì solu ramenta munumenti murtuarii, zitelli nati dopu cù malfurmazioni o malatìe, càncari ch’ùn anu finitu di spàrghjesi cù stu nuvulacciu ch’hà fattu u giru di a terra parechje volte…
35 anni dopu, ci hè sempre a guerra di i sciffri… Ma cumu dubbità di u scempiu umanu di sta catastrofa quand’omu sà ch’ellu ci hè vulsutu parechje centinaie di millaie di personi per pruvà di nettà i lochi di l’elementi radiuattivi i più periculosi. Parechji morti ùn sò micca stati resi à e so famiglie perch’è ci hè vulsutu à interrali cum’è lozzi radiuattivi… Ùn ci hè micca bisognu di sapè u nùmaru di ste suffrenze. U so prezzu hè digià incalculàbile.
U nucleariu hè un perìculu tamantu per l’Umanità. Ghjucà cù i prugetti cum’è Iter, o lancià novi prugrammi nuclearii, hè un crìmine contr’à ss’Umanità. •
