Corsica Pulita hè una cuurdinazione d’associ di difesa di l’ambiente, di a salute è di cullettivi anti-màffia chì si sò aduniti in 2023 per dumandà u ritiru di u Pianu Lozzu di a Cullettività di Corsica. « Corsica Pulita hè sana sana fidata à u bè cumunu, à a priservazione di a nostra ìsula magnìfica è à l’interessu d’ogni corsu » dice u so situ internet. « I nostri membri vènenu d’orizonti vàrii è ùn sò micca impegnati in pulìtica. Simu uniti da a nostra determinazione à prutege a Corsica è à fà sente a nostra voce per un avvene più giustu è più durèvule. » Corsica Pulita si dà cum’è scopu di fà sapè à i Corsi i prublemi gravi posti da u Pianu Lozzu di a Cullettività di Corsica. Vole mubilizà eletti è citatini da ch’ellu sìa ritiratu stu pianu ch’hà sceltu a filiera di i Cumbustìbili Soddi di Recuperazione (CSR) chì porghje cunsequenze negative nant’à l’ambiente, a salute, i rìsichi maffiosi è l’ecunumìa.
A cuurdinazione adunisce 17 associ : Zeru Frazu, Le Garde, U Levante, A Spiriata, Solidarité Droits Devoir Vivre Ensemble, Passaportu Rescue Life ADN, Avvene Ghjustu è Resiliente, Global Earth Keaper, A Rimigna, A Sentinella, Associu Si pò fà, La Ligue contre le Cancer, Pumonte Pulitu, ABCDE, u Cullettivu a Màffia Nò a Vita Iè, u Cullettivu Màssimu Susini.
Dinùnzianu a filiera CSR ch’ùn vole dì u so nome veru : incinerazione di i lozzi. Una scelta chì cunduce à custruisce usine maiò ch’anu da custà omancu 119 millioni d’àuri per una caldara, vale à dì un incineratore, è 50 millioni pè un centru di trascelta ch’ùn ghjove à nunda postu chì una volta imbullighjati, i lozzi sò crosci è ùn ponu esse spiccati currettamente per esse riciculati. A scelta si deve fà à u livellu di u cusummatore.
U tuttu hà da indebbità a Corsica parechji anni. U centru di trascelta hè messu in ballu in Monte, è a caldara bramata in u circondu aiaccinu. U scopu hè di pruduce energìa sbarrazzèndusi di i lozzi. Ma ferma un incinerazione è dunque pulluzione per l’ària, l’acqua, a natura à l’intornu, vale à dì gattiva nutizia pè a salute.
Per Corsica Pulita, sta suluzione s’hà da impone à a trascelta selettiva, pè a quale l’eletti di terrenu, i merri, e cumunità di cumune è u Syvadec, ùn feranu più i sforzi ch’ellu ci vole. « Simu stumacati di pettu à l’ozzioni aduprate ind’è stu pianu. Validà a filiera CSR senza avè fattu stùdii di faciabilità, hè un scàndalu, allora ch’ùn si sà mancu sè sta filiera puderà esse messa in ballu in Corsica, ghjè cumu dumandà à l’eletti di vutà à l’accecu ! »
Senza cuntà ch’ellu hè una campa pè a màffia chì si piace in sse cundizioni di cunfusione. « A dice ancu à JIRS (ghjuridizione interregiunale specializata) l’ecunumìa di i lozzi hè cucagna pè a màffia. Ùn ci hè peghju suluzione chì quella di privatizà l’ecunumìa di i lozzi in Corsica. »
Parechji altri prublemi si pònenu da leghje nant’à u situ di Corsica Pulita. Puru, petizione, cunferenze, manifestazione ùn ci l’anu fatta, u cusì dettu Pianu Territuriale di Prevenzione è di Gestion di i Lozzi (PTPGD) hè statu adupratu u 26 di lugliu da l’Assemblea di Corsica.
Corsica Pulita hà annunziatu ch’ella purterà lagnanza in ghjustizia. •
