Dapoi u 20 di ghjennaghju è u so ritornu à a Casa Bianca, Donald Trump hà multiplicatu l’annunzie e più sceme è zifratu decreti disprezzanti contr’à i diritti umani, cum’è a rimessa in càusa di u drittu d’asiliu è di u drittu à a naziunalità americana à quellu chì ci nasce. Puru ssu drittu hè prutettu da u 14u amendimentu di a Custituzione di i Stati Uniti. Trump hà dichjaratu u statu d’urgenza à a fruntiera messicana, ripigliendu a custruzzione d’un muru di Berlin à l’usu americanu… Amy Fischer, direttrice pè i dritti di i rifugiati à Amnesty International, hà dinunziatu « un prugramma gattivu, razzistu è antimigrante ». Espulsioni, razzia, filmi publicitarii perversi, appiecazione d’auto espulsione per smartphone, retali suciali frattighjati, una caccia à l’omu degne di e littature si scatineghja…
Un antru decretu ritira i Stati Uniti di l’accordi di Parigi pè u climà. Intensità di l’uragani, forte piosse, sicchine, incèndii di fureste cum’è in California, grandi freddi… sò a prova evidente chì l’Amèrica hè tuccata da i sregulamenti climàtichi. Ma Trump cuntinueghja à dì ch’ùn hè chè burla… I Stati Uniti sò frà i più grandi emettore di carbone in u mondu. Sorte di l’accordu di Parigi hè un inghjustizia pè i paesi chì sòffrenu u più di ssi ciambuttamenti climàtichi, ma dinù un invitu à fà listessu per parechji altri paesi.
In u listessu tempu, Trump s’attacca à i scientìfichi. Prugrammi piantati, licienziamenti massivi, taglia nant’à i bugetti, a ricerca nant’à u riscaldimentu climàticu hè in mira. Dinù sò piantate e suvvenzioni à i prugrammi nant’à a diversità, a parità, l’inclusione è sò licenziati l’impiecati chì ci travagliàvanu…
Altra catastrofa, Trump hà ritiratu i Stati Uniti di l’Urganisazione mundiale di a salute. Èranu membri dapoi u 1948. È ghjè tremendu pè e pulìtiche di salute in u mondu, a surveglianza di l’epidemìe cum’è ebolà, e vaccinazioni contr’à a malarià, a lotta contr’à u sidà o a tuberculosa, i prugrammmi per migliurà a salute di e donne, di i zitelli, di i più pòveri, l’aiutu umanitariu in e zone di cunflitti, l’aiutu à i paesi sottusviluppati, e pulìtiche di cuntrollu di u tabaccu, di l’alcool, è e ricerche scientìfiche da tutte e mamme. Centinaie d’impiecati di l’istitutu naziunale di a salute chì travagliàvanu à a ricerca biomedicale è a salute pùblica sò licenziati. E taglie bugetarie sò maiò nant’à a ricerca medicale. Un muvimentu di prutestazione Stand Up for Science prova à vultassi.
Tutte e pulìtiche chì prutègenu i dritti di e personi transgèneru sò dinù rimesse in càusa. Trump hà zifratu quì uni pochi di decreti vere minaccie contr’à e libertà. E donne americane s’inchiètanu dinù pè i so dritti à l’abbortu è à a cuntraccezzione.
U presidente americanu hà ritiratu dinù i Stati Uniti di u Cunsigliu di i diritti di l’omu di l’ONU, è di parechje altre stituzioni umanitarie. Un decretu suspende e suvvenzioni à l’ONU per l’aiutu à i palestiniani, è dumanda à rivede l’aiutu à l’ONU pè a scienza è a cultura (Unesco).
Un antru decretu rimette in càusa l’impiechi federali è mette fine à u teletravagliu.
Decretu torna da pudè spluttà u petroliu è u gasu di l’Alaska senza pastoghja, cumpresu a zona salvàtica di l’Arctica… Trump hà minacciatu di piglià u cuntrollu di u canale di u Panamà, di u Groenland è ancu di u Canadà ! Hà zifrattu dinù un decretu per rinumà u golfu di u Messiccu, golfu di l’Amèrica !
Infine chì, uni pochi d’elettori s’avvèdenu quant’elli anu da esse longhi ssi quattr’annu di mandatura Trump. •
