1966 Esce l’8 di dicembre, u primu nùmaru. Arritti si face a voce di tutte e mosse di l’èpica : pè a salvezza di u caminu di ferru ; contr’à a vignetta auto, campagna lanciata in u 1964 da u Cedic, creatu da Màssimu Simeoni è Paul Marc Seta ; a nàscita di l’ARC (1967) ; l’innò à e prove nuclearie à l’Argentella (1969) ; a lotta contr’à u schemà di l’Hudson Institute è u turìsimu di massa (1970) ; e mubilisazioni contr’à e fanghe rosse chì spùtanu u so mullizzu in mare (1972) ; e rivolte paisane in Fium’Orbu contr’à a pulìtica di a Somivac chì si compra e terre per rimèttele à i colon sbarcati d’Algeria dopu à l’indipendenza, pruvuchendu qualchi annu dopu l’evenimenti d’Aleria cù u scàndalu di a sciaptalisazione di u vinu, ecc.
1973 U 19 d’aostu, Massimu Simeoni pruclama in prima pàgina : « Je suis nationaliste corse », cunsacrendu l’evuluzione di u naziunalìsimu corsu dapoi i primi passi di a nàscita di l’ARC in u 1967 è a so trasfurmazione d’Azzione Regiunalista Corsa in Azzione pè a Rinàscita di a Corsica in u 1971.
1974 « Autunumia » u prugettu di l’ARC vene di esce. Un secondu « Autunumia » serà publicatu in u 1991 da l’UPC. Liber Bou, mandatu da Parigi per neguzià cù i Corsi, dichjara : « Même 200.000 Corses autonomists ne feraient pas changer la Constitution »…
1975 Di lugliu, Arritti apre a so stamperia militente in Toga. D’aostu, sò l’evenimenti d’Aleria. Arritti scappa di pocu à a sciugliera (Màssimu ancu assai avia dichjaratu u settimanale à nome di a so mamma) ; cum’è l’ARC, Arritti spiazza in fùria i so archivi. Ind’è a notte, un nùmaru speciale hè tiratu à 20.000 esempiarii è sparsu in tutta a Corsica.
1976 Arritti rende contu di u prucessu d’Edmondu. Di maghju, u FLNC hè creatu. D’aostu, Max Simeoni plasticheghja à faccia scuperta a cava di u colon Cohen-Skali per dinunzià u scàndalu d’Aleria ch’ùn hè ancu regulatu ma dinù e barbuserie di u prefettu Riolacci, è piglia a machja. Ùn serà mai cundannatu chì u Statu si sà rispunsèvule è ùn vole dalli una tribuna.
1977 15 di maghju, un incendiu criminale strughje a stamperia d’Arritti, hè rivendicatu da Francia, muvimentu barbusu cumandatu da a prefettura d’Aiacciu. Arritti sorte listessu è scrive : « I barbouzes Fora ! Voici leur œuvre ». A stamperia Sammarcelli ripiglia l’edizione. Per parà l’attentati barbusi, i militenti di l’ARC vèghjanu a notte fucili in manu… Di lugliu, Màssimu Simeoni s’affacca sott’à u tendone di a fundazione di l’Unione di u Pòpulu Corsu chì si scrive in a lìnea di l’ARC.
1978 Arritti stampa u so intìtulu in turchinu per salutà u Sporting Club di Bastia in finale di a cuppa d’Auropa UEFA. Trè anni dopu vince a cuppa di Francia.
1980 Durante à l’annate 80, Arritti scumbatte per ottene l’abilitazione à publicà l’annunzii legali, strappata dopu à parechji anni di battaglie ghjudiziarie.
1981 Arritti publicheghja e prove di a barbuseria di u Statu ind’è l’affare Bastelica-Fesch. Greve di a fame, manifestazioni, isula morta, a Corsica hè in bullore. U muvimentu autunumista s’internaziunalizeghja cù a fundazione di l’Alleanza Lìbera Aurupea in Bastia. Ssa pulìtica cunducerà à l’elezzione di Màssimu Simeoni à u parlamentu aurupeu in 1989, po di Francescu Alfonsi in 2009 è in 2019. D’ottobre, 220 anni dopu à a so chjusura, l’Università Pasquale Paoli apre e so porte.
1982 Primu statutu particulare. A prima assemblea di Corsica s’adunisce in Aiacciu. L’autunumisti còntanu 8 eletti. D’altre tappe stituziunale seguiteranu, u statutu Joxe in 1991, u prucessu di Matignon in 2001, u riferendum persu in 2003 per scioglie i cunsiglii generali… è si seguìtanu dinù i scrutini scrivendu a prugressione di u muvimentu naziunalistu sin’à a presa di rispunsabilità in 2015. À longu à tutte st’annate Arritti rende contu di e sfarente pulìtiche d’unione è di e crise à u senu di u naziunalìsimu.
A prugressione ùn si face micca senza casticu.
1986 Arritti hè u primu à publicà a carta di u nùvulu nucleariu di Cernobile chì copre a Corsica. Durante più di 30 anni Arritti dinunzia, sparghje documenti inediti è rivela a verità nant’à a bucia francese.
1987 Prima ghjurnata d’Arritti in Bastia cù invitata principala a ministra di a lingua è di a cultura catalana Aina Moll. E ghjurnate d’Arritti anu sempre avutu un ribombu aurupeanu cù intervenenti d’altu livellu cum’è in 1999 John Hume, premiu Nobele di a pace irlandese, o Michel Rocard l’annu dopu in 2000. Hè a ghjurnata d’Arritti di u 1990 chì fonda dinù a dimarchja Femu Quì.
1988 A prima pàgina d’Arritti publicheghja a muzione stòrica di u 13 d’ottobre di l’Assemblea di Corsica chì affirma l’esistenza di u pòpulu corsu. Un antra tappa francata.
1990 À longu à l’annate 90 hè l’affruntamentu trà naziunalisti. Arritti face campagna pè a scelta di a via demucràtica. L’edituriali ripètanu senza sfiatassi chì a viulenza hè un perìculu pè a càusa corsa. St’annate nere pianteranu cù u protocole di Migliacciaru di lugliu 1999. Ind’è l’annate 90 dinù, manifestazioni, cunferenze è mosse da tutte e mamme à favore d’un veru statutu fiscale. Arritti porghje a so parte cù publicazioni nant’à sfarenti statuti fiscali in Auropa o invitendu à e so Ghjurnate esperti di a questione.
Arritti face campagna dinù in sustegnu à u cullettivu pè a lege liturale, dinunziendu e minaccie nant’à l’ambiente.
1992 Hè a tremenda catastrofa di Furiani. Arritti sustenerà u cullettivu di e vìttime sin’à ottene in 2021 a ricuniscenza naziunale di u drama cù a lege Castellani chì sacralizeghja a data di u 5 di maghju.
1996 Arritti franca una tappa di prufessiunalisazione rializendu a so machetta cù l’impresa Mediaterra. In 2018, Vanina Bellini piglia a so sèguita.
1998 Cù l’assassiniu di u prefettu Erignac. S’abbatte una ripressione ceca. Nucenti sò perseguitati, u pòpulu corsu hè dettu « pòpulu prefeticidiu ». U commandò serà arrestatu in 1999 è cundannatu in 2003.
S’affacca u prefettu Bonnet. Màssimu Simeoni è Arritti alèrtanu nant’à a so persunalità. A stòria per disgrazia cunfirmerà… D’aprile 1999, nant’à l’òrdine di u prefettu, gendarmi pìccianu focu à a pagliotta « Chez Francis ». Bonnet serà cundannatu in 2003 à un annu di prigiò è dui attempati.
2007 Arritti rende contu settimana dopu à settimana di u prucessu d’Yvan Colonna arrestatu in 2003. Inghjustizie, dùbiti, prucedure falsificate, cumbrìcule di u Statu sò dinunziati. Listessu pè u secondu prucessu in 2009, po u terzu in 2011. Yvan Colonna hà sempre dettu ch’ellu era nucente. Per ellu, pè i membri di u commandò Erignac è per l’altri prigiuneri corsi, Arritti mena campagna per l’avvicinamentu di i prigiuneri è pè a fine di e prucedure d’eccezzione.
2008 Arritti mena campagna contr’à « ssu Padduc » quellu di a dritta corsa chì strughje a lege liturale. In 2015, u prugettu hè ritiratu. Ripigliatu da a nova magiurità giacubbista sott’à a rispunsabilità di Maria Guidicelli, i naziunalisti partecipèghjanu à u dibàttitu è Arritti mena campagna à favore di a difesa di l’ambiente, di i spàzii agrìculi è d’un veru sviluppu durèvule, u Padduc hè adupratu di dicembre 2015.
2010 Arritti esce ormai in culore, tappa impurtante ind’è a vita di u settimanale.
2014 Di marzu, Gilles Simeoni hè elettu merre di Bastia, primu passu ver di a presa di rispunsabilità pè i naziunalisti. Di ghjugnu, u FLNC mette fine à e so azzioni militare.
2015 L’Assemblea di Corsica hè naziunalista, sta prima vittoria hè seguitata da un antra in 2017 pò in 2021. S’accumpàgnanu dinù di vittorie à l’aurupeane, à e legislative, à e senaturiale, à e municipale… 10 anni di scrutini à favore d’una suluzione pulìtica neguziata.
2016 Arritti apre u so situ internet : arritti.corsica
2018 Si spenghje in Bastia Edimondu Simeoni.
2019 Creazione di u cullettivu Maffia Nò Vita Iè di sittembre. Di nuvembre nasce dinù u cullettivu Massimu Susini. In 2025 s’adunìscenu in una cuurdinazione anti màffia cù muvimenti di a difesa di l’ambiente per dinunzià ssu perìculu. Arritti sustene sta lotta.
2022 Assassiniu d’Yvan Colonna in cundizioni fosche. L’emuzione hè forte in Corsica cunvinta d’un assassìniu cumandatu. Arritti rende contu di e manifestazioni è u clima d’insurezzione chì danu nàscita à u prucessu di Beauvau.
2023 Arritti hè in dolu. Si spenghje in Bastia u nostru fundatore, Màssimu Simeoni.
2024 A stamperia Chinesi in Furiani, ripiglia a sèguita di a stamperia Sammarcelli ch’hà chjosu e so porte à u Tragone è ùn pò mantene u so serviziu per Arritti.
2025 Si cummemureghja i 300 anni di a nàscita di Pasquale Paoli. D’aprile, hè a prima vìsita d’un Papa in Corsica : Papa Francescu.
2026 L’assemblea naziunale adopra u prugettu di legge custituziunale per l’autunumia di a Corsica. Po u Senatu u scalzitteghja è vota contru. A Corsica pare in una strada senza sboccu. Ma « a lotta cuntinueghja » dice Femu a Corsica.
In ssu cuntestu Arritti Festighjeghja i so 60 anni. •








