Passate e catastrofe, u terrore, u dolu, l’emuzione di e pupulazioni… omu si scorda di u più impurtante, fanne l’analisi, tiranne e cunsequenze, parà e pròssime catastrofe…
Fukushima hè stata un attualità cuntìnua notte è ghjornu à longu à settimane è ancu mesi sani. Eppò, più nunda. Ferma a cuntaminazione in i lochi interdetti per sèculi, ferma u capatoghju di u millione è mezu di metri cubi d’acque cuntaminate ammansate in i bacini ch’ùn si sà più induve allucali, dinù e centunaie di millaie di sacchi di terre è altri mulizzi impuzzichiti. Ferma u smantellamentu di a centrale ch’hà da durà omancu quarant’anni, cù u capatoghju di i lozzi radiuattivi ch’ellu ci volerà mette in qualchi locu. Ferma u trattamentu di tutti sti lozzi chì nisun tecnulugìa attuale ùn hè capace di mette in ballu. Ferma u corium, materia ultraradiuattiva, caghjata artificialmente sott’à a centrale, è ch’ellu ci volerà à caccià è trattà, senza sapè per avà cumu fà. Ancu e mascine chì sò state mandate à u so cuntattu sò cascate in panna per vìa di a radiuattività troppu alta. Da sapè chì u corium di Tchernobyl, ùn hà mai statu ricuperatu. U prublema hè chì in Fukushima, ssu corium ferma instàbile è pò turnà in fusione. Ferma dinù l’oceanu chì cuntinueghja à ingòllesi l’acqua chì corre sopra è sott’à a centrale. È ferma Tepco (l’Edf giappunese ch’hà in càrica u prugramma nucleariu nippone) chì ùn tira nisun lezziò o quasi, di ciò ch’hè accadutu. « Un disastru creatu da l’omu » hà dettu u raportu d’inchiesta di u parlamente giappunese un annu dopu à a catastrofa, diciendu chì « una mansa d’errori è di lascia corre vuluntariu anu messu a centrale di Fukushima Daishi senza priparazione di pettu à l’accidente ». 10 anni dopu, ùn ci hè nisun rispunsabilisazione o quasi. Puru, frà l’esperti giappunese di u nucleariu, Toshio Kimura, ingeniore di Tepco, avìa alertatu in 2005 diciendu « sè Fukushima hè tuccatu da un tsunamì, e pompe d’acqua marina serìanu perse ». Sei anni dopu, ghjè ssa panna chì pruvucava a fusione di trè reattori nant’à quatru. Oghje Toshio Kimura alerta torna. Publichendu un libru « Cumu l’energìa nuclearia hà da tumbà a nazione », conta cumu e lezzioni di Fukushima ùn sò state ritenute, cumu Tepco cuntinueghja hà burlà a ghjente, è cumu s’ingattivìscenu i difetti di sicurezza di e so centrale nuclearie. L’autorità di regulazione nuclearia giappunese, a NRA, vene d’impedisce a riapertura di a centrale di Kashiwazaki Kariwa à 250 chilòmetri di Tokyo. Hè a più putente centrala nuclearia di u mondu è si custateghja parechji prublemi di securità per parà u rìsicu terrurista. Una vintina di rimpròveri gravi sò stati fatti è certi disfunziunamenti anu duratu durante più d’un mese ! Un ispezzione hè lanciata. È dì chì, nanzu à a catastrofa di Fukushima, u Giappone era cunsideratu cum’è a nazione nuclearia a più sicura di u mondu !… Ghjè dì quantu i pòpuli sò burlati !
À u Giappone, quattru reattori sò sempre attualmente in attività dapoi l’accidente di Fukushima, è nove anu ottenutu l’autorisazione di riapre. E pupulazioni sò inchiete è dui anziani primi ministri giappunesi, Junichiro Koizumi è Naoto Kan, anu chjamatu à un arrestu tutale di u nucleariu. Sò riflessioni chì tutti i paesi di u mondu duverìanu avè inseme. Invece… ùn si ne parla quasi micca. •
