Ghjacumina Fieschi si n’hè andata a settimana scorsa in Prupià, dopu una longa malatìa. Era a moglia di Ghjàcumu Fieschi, militante di e prime ore, nanzu à Aleria, eppò à mezu à quelli chì èranu accumpagnendu Edmond durant’à l’uccupazione di a cantina Depeille, è in parechje azzioni curaghjose è ancu piriculose fatte durant’à tutti st’annate di militantisimu naziunalistu, cum’è traspurtore di u sindicatu Strada Corsa ò cum’è uppunante à a centrale di u Vazziu. Ghjacumina l’hà sempre sustenutu senza cuntà u so tempu, o fendu fronte à u perìculu è à e difficultà quand’ellu era scappatu è ricercatu. Arritti pienghje una amica fida, è una militanta esimpiara. Mandemu e nostre cundulianze amicale è fraterne à Ghjàcumu, à i so figlioli Stèfanu è Patrizia, è à tutti quelli chì li sò cari. •
